Mike буюу Энхийн-Одын тоглож буй "San Francisco Dons" баг өнөө өглөө "Seattle Redhawks" багтай тоглож 62-59-ийн харьцаагаар талбайдаа өрсөлдөгчөө буулган авлаа. Тэд эхний хагаст оноо дутуу байсан ч хоёрдугаар хагаст өрсөлдөгчөө оноогоор гүйцэж, улмаар 3 онооны давамгай тоглолт өндөрлөлөө. Энэ тоглолтын багийнхаа эхний оноог холын зайн шидэлтээ амжилттай болгосноор Ш.Энхийн-Од авчирсан бөгөөд тоглолтын туршид багийнхаа лидер байж чадлаа. Өмнөх тоглолтуудад багаа оноо авалтаар тэргүүлж байсан Уиллиамс, Мобо зэрэг тоглогчид энэ өдөр өөрсдийн түвшинд тоглож чадаагүй бол эсрэгээрээ Монгол тоглогч Ш.Энхийн-Од хамгаалалт, довтолгоонд аль, алинд нь тун идэвхитэй сайн тоглосноор, багтаа ялалтад хөтөллөө. Түүний оноо авалт сайн тоглолтод баг нь хожил байгуулсан удаа цөөн. Харин өнөөдөр баг нь хожоод зогсохгүй Майк оноогоор тэргүүлсэн нь өөрийнхөө давуу талуудыг илэрхийлсэн тоглолт боллоо. Маркус Уиллиамс, Майк Шаравжамц нар тус бүр 18 оноотой болж, Донсуудыг тэргүүллээ. Энэ бол манай тоглогчийн хувьд өндөр амжилт боллоо. 

32 минутын турш оноогоор давамгайлж байсан "Seattle Redhawks" ийнхүү хожигдож, "San Francisco Dons" хоёрдугаар хагаст сэргэсэн тоглолтоо үргэлжлүүлж хожил байгуулж чадлаа. Ийнхүү "San Francisco Dons" 8 дахь хожлоо байгуулснаар, 8 хожил, 3 хожигдолтой болж байна.