Өнөөдөр Жүдо бөхийн барилдааны гурав дахь өдөр эхэлж байна. Манай улсаас эмэгтэй 57кг-ын жинд Л. Энхрийлэн, эрэгтэй 73кг-ын жинд Б. Эрдэнэбаяр нар өрсөлдөнө. 
Б. Эрдэнэбаяр өнөөдөр барилдах эхний даваанд 2023 оны Дэлхийн аварга Нилс Штамптай хүч сорино.
Уг жинд Нилс Штамп нь олимпын чансаагаар 3-т бичигдэж байгаа бол манай улсын тамирчин Б. Эрдэнэбаяр 27-т бичигдэж байна.
ОУХМ Б. Эрдэнэбаяр нь 2023 оны олон улсын Тбилиси (Tbilisi) Гранд Слам тэмцээний Аварга, 2024 оны зуны олимпын эрх олгох Душанбе (Dushanbe) Гранд Слам тэмцээнд 5-р байр, 2024 оны ДАШТ-ий 7-р байранд орж байсан удаатай. Түүний хувьд Парис-2024 нь анхны олимп юм. 

Харин Швейцар улсын тамирчин Нилс Штампын хувьд хоёр дахь олимп бөгөөд өмнө нь Токио-2020 олимпод 73 кг-ын жинд өрсөлдөж, анхны тоглолтдоо хасагдсан. Тэрээр 2024 онд Арабын Нэгдсэн Эмират улсын Абу Даби хотноо болсон жүдо бөхийн ДАШТ-ий 73 кг-ын жинд хүрэл медаль, 2023 онд ДАШТ-ий 73 кг-ын жинд алтан медаль хүртэж жүдо бөхийн дэлхийн аварга шалгаруулах тэмцээнээс алтан медаль хүртсэн анхны Швейцарын жүдоч болсон.

ОУХМ Б. Эрдэнэбаяр эхний даваанд ялбал Испани улсын тамирчин Касас Рока, Гамби улсын тамирчин Файе Нжи нарын аль хожсонтой нь барилдана.