Тус уулзалтын дараа “Төв цэнгэлдэх хүрээлэн ХХК”-ийн гүйцэтгэх захирал Ж.Энхжаргалан:
Өнөөдөр МҮБХ-ны удирдлагууд, Монгол бөхийн аварга, гарьд, харцага цолтнууд, засуулууд болон бөх тайлбарлагч нарын төлөөллийг хүлээн авч уулзлаа.
Төв цэнгэлдэх хүрээлэнг удирдаж буй хүний хувьд бид үндэсний их баяр наадмын зохион байгуулалтыг аюулгүй, тав тухтай сүр жавхаатай байлгахад онцгойлон анхаарч байна. Бөхчүүд, харваачид, наадамчин олны сэтгэлд нийцсэн орчин бүрдүүлэх нь бидний үүрэг бас зорилго юм.
Өнгөрсөн жилийн наадмын үеэр барилдааны зүлэгтэй холбоотой асуудал олон нийтийн анхааралд орж, санал шүүмж өрнөсөн. Энэ удаад бид асуудлыг нухацтай авч үзэн Монголын Үндэсний Бөхийн Холбоо бөхчүүдийн санал хүсэлтийг тусгаж тэдэнд хамгийн тохиромжтой шийдлийг хэрэгжүүлэхээр ажиллаж байна. Баяр наадмын өмнө тестийн сорилго барилдааныг Төв цэнгэлдэх хүрээлэнд зохион байгуулахаар төлөвлөж байна.
Бид аливаа асуудалд хурдан хариу арга хэмжээ авдаг байх байдлыг эрхэмлэж та бүхний санал шүүмжийг нээлттэй хүлээн авч хамтдаа ярилцан Монгол түмний их баяр наадмыг улам сайжруулахын төлөө хичээн ажиллана.
Дараагийн удаад Монголын үндэсний харваачдын холбоо цэц мэргэн харваачдаа хүлээн авч уулзан тэдний саналыг сонсож харвааны орчныг сайжруулах тал дээр анхаарал хандуулах болно.
Нээлттэй байдал бидний эрхэм зорилго. Төв цэнгэлдэх хүрээлэнгийн үйл ажиллагааг улам бүр ил тод болгон шинэчлэл хийж ажиллах болно.
