Азийн наадмын сагсан бөмбөгийн хэсгийн тоглолтууд үргэлжилж манай шигшээ хоёр дахь тоглолтоо Хонгконгын эсрэг тоглож эцсийн мөчид 64-69 харьцаатай хожигдол амслаа. 

Эхний үед манайх 3 оноо илүү буюу 20-17 харьцаатай өндөрлөсөн ч хоёрдугаар үед эсрэг багийн төвийн тоглогч болон хурдан довтолгоог хамгаалж чадалгүй 30-37 харьцаатай дуусав. Манай багийн алсын зайн шидэлтүүд оновчтой болж чадалгүй явсаар гуравдугаар үед эсрэг багаас 6 оноо дутуу сүүлийн үе рүү оров. Гэсэн ч дөрөвдүгээр үеийн сүүлийн гурав дахь минутад  Г.Болор-Эрдэнэ хоёр удаа дараалан алсын зайн шидэлт амжилттай болгон оноог тэнцүүлж илүү ч гарах боломжтой тоглолт үргэлжлэв. Гэсэн ч жижиг хоёр алдаа гаргаснаар Хонгконгын баг чөлөөт шидэлт гүйцэтгэн оноо илүү гарч үүнийг нь нөхөж чадалгүй явсаар 64-69 харьцаатай тоглолт өндөрлөлөө. Амьсгаа давчдуулсан тоглолтод Г.Болор-Эрдэнэ 22 оноо, Т.Ууганбаяр 14 оноо, А.Энхбаясгалан, Х.Оргил нар 9 оноо авсан бол эсрэг багаас Ки Лий 19 оноо авч багаа тэргүүллээ.

Манай баг дараагийн тоглолтоо Тайваны шигшээтэй хийх ба хэрвээ хожвол хэсгээсээ гуравдугаар байраар шалгарах боломжтой. 

Гэрэл зургийг Э.Харцага