Леброн Жэймс энэ улиралд НБА-гийн түүхэн дэх хамгийн өндөр орлоготой тоглогчоор нэрлэгдэж байна. Леброн пүрэв гаригт Форбес сэтгүүлээс гаргасан хамгийн өндөр орлоготой NBA тоглогчдын жагсаалтыг ес дэх жилдээ тэргүүлж, бараг 30 сая доллараар бусдаасаа илүү байна. Лигийн хамгийн өндөр орлоготой 10 тоглогч татвар, төлөөлөгчийн хураамж төлөхөөс өмнө 750 сая доллар цуглуулах гэж байна. Энэ үзүүлэлт өнгөрсөн жилийн нийт 714 сая ам.долларын дээд амжилтыг эвдэж, сүүлийн арван жилийн хугацаанд 120 гаруй хувиар өссөн байна. Леброн энэ улиралд Лос Анжелес Лэйкерсээс 44 сая орчим долларын орлого олж, хоёр жилийн 85.6 сая долларын гэрээгээ дуусгах юм. Тэрбээр 2024-25 оны улирлыг дуустал Лэйкерстэй үлдэх 2 жилийн 97 сая долларын гэрээг сунгасан. Forbes-ийн тооцоолсноор Жэймс энэ жил талбай дээр 80 орчим сая долларын ашиг олж, нийтдээ 124.5 сая долларт хүрнэ гэж тооцоолжээ. Түүний зарим хөрөнгө оруулалт тоон дээрээ харагдахгүй байгаа тул энэ нь бодит тооноос бага тооцоо гэж үзэж байна. Тухайлбал, түүний “SpringHill Entertainment” компани өнгөрсөн онд 725 сая ам.доллараар үнэлэгдсэн байна. Тэрбээр Major League Pickleball баг, Ladder спортын хоол тэжээлийн компани, Canyon Bicycles болон бусад олон томоохон хөрөнгө оруулалттай. Леброн Жеймс мөн Бостон Ред Сокс болон Ливерпүүл клубын цөөнхийн эзэн юм.
Леброн энэ зуны эхээр тэрбумтан болсон анхны идэвхтэй тамирчин болж, Майкл Жорданы эгнээнд нэгдсэн NBA-гийн түүхэн дэх хоёр дахь тоглогч болсон юм. Тэрбээр мөн энэ сарын эхээр цаг нь ирэхээр Лас Вегаст NBA-г өргөжүүлэх боломжтой багийг эзэмшихийг олон нийтэд уриалсан нь түүний санхүүг улам бүр баталгаатай өргөжүүлж байгаа юм. Тэрбээр татварын өмнөх орлогоороо нэг жилийн дотор 100 сая ам.доллар давсан идэвхтэй 10 тамирчны нэг бол багийн спортод ийм амжилт үзүүлсэн таван тамирчны нэг юм. Даллас Ковбойс багийн хамгаалагч Дак Прескотт болон хөлбөмбөгийн од Лионель Месси, Криштиану Роналду, Неймар нар энэ жагсаалтад мөн нэрлэгддэг.
Сагсан бөмбөгөөр ашиг орлогоороо өндөр тоглогчдийн жагсаалтын хоёрдугаарт “Голден Стэйт Уарриорс” багийн од Стивен Көрри 95.1 сая ам.доллараар бичигджээ. Тэрбээр 48.1 сая ам.долларыг талбай дээр олсон орлогоороо, 47 сая долларыг өөр газраас олсон орлогоороо тэнцүү хуваажээ. Тэрбээр өнгөрсөн улиралд Уарриорс багтай дөрвөн жилийн 215 сая долларын гэрээ байгуулсан бөгөөд 2025-26 оны улирлын сүүлийн жил 59.6 сая доллар төлөх юм. Жагсаалтын гуравдугаарт Кевин Дурант 88 сая ам.доллараар бичигджээ. Милуоки Бакс багийн од Жианнис Антетокоунмпо 86,5 сая ам.доллараар дөрөвдүгээрт, Лэйкерс багийн ахмад тоглогч Рассел Уэстбрүүк 82,1 сая ам.доллараар тавдугаарт бичигджээ. Клэй Томпсон, Дэмиан Лиллард, Жеймс Харден, Пол Жорж, Жимми Батлер нар эхний 10-т жагсаж байна.
Н.Бэлгүүн
