2026 онд АНУ, Канад, Мексик улсуудад явагдах ДАШТ болон 2027 онд Саудын Араб улсад зохион байгуулагдах Азийн Цомын тэмцээнүүдийн урьдчилсан шатны эхний шатны тоглолтоо Монголын хөлбөмбөгийн үндэсний шигшээ баг 10-р сарын 12-нд Тажикстан улсад хийсэн бол хариу тоглолтоо 10-р сарын 17-ны 15:00 цагаас Монгол улсад Улаанбаатар хотноо МХБХ-ны талбайд Афганистан улсын шигшээ багтай хийнэ. Афганистан улсад улс төрийн үймээнтэй байгаа учир хоёр багийн эхний тоглолт Тажикстан улсад болоход манай шигшээ баг эхний үед 0-0-ээр тэнцсэн. Харин хоёрдугаар үед улаан картнаас эхлээд тоглолтын агуулга болон үр дүнгүүд манай багийн хүссэний дагуу болоогүй билээ. Монголын хөлбөмбөгийн шигшээ багийн ахлагч Х.Цэнд-Аюуш улаан карт авснаар талбайдаа болох тоглолтод оролцох эрхгүй болсон. Улмаар манай шигшээ багийн ахлагчийн үүргийг энэхүү тоглолтод О.Мөнх-Оргил гүйцэтгэхээр болжээ. 

Монгол болон Афганистан улсуудын шигшээ багийн хариу тоглолтын өмнөх уулзалт болон хэвлэлийн хурал өнөөдөр МХБХ-ны байранд явагдлаа. Ингэснээр маргааш буюу 10-р сарын 17-ны 15:00 цагаас МХБХ-ны талбайд тоглолт явагдахад бэлэн болж байна. Манай баг 1-0-ийн харьцаатайгаар эхний тоглолтод хожигдсон учраас хариу тоглолтод 2 гоол оруулж, хожих даалгавартай болоод байна. Хөлбөмбөг дэмжигчид та бүхнийг МХБХ-ны талбайд мягмар гарагт цуглаж, үндэсний шигшээ багаа дэмжихийг уриалж байна.