Сонирхогчдын боксын эрэгтэйчүүдийн Дэлхийн аварга шалгаруулах тэмцээн тавдугаар сарын 01-14-нд Узбекистан улсын нийслэл Ташкент хотод зохион байгуулагдсан. Ташкентийн рингэнд 104 орны 667 боксчин оролцохоор урьдчилсан мэдүүлгээ өгөөд байгаа бөгөөд манай улсаас ахлах дасгалжуулагч Ж.Энхтөр, зөвлөх дасгалжуулагч узбекистан мэргэжилтэн Аброр Турсунпулатов, дасгалжуулагч Б.Эрдэнэбаяр, Ц.Даваацэрэн нарын удирдлага дор 10 боксчин дэлхийн шилдгүүдтэй өрсөлдсөн билээ. Тэмцээний нийт шагналын сан 5.2 ам.доллар бөгөөд алтан медаль 200, мөнгө 100, хүрэл 50 мянган ам.доллар гардан авсан юм. 

Тодруулбал, 2023 оны сонирхогчдын боксын дэлхийн аварга шалгаруулах тэмцээний -63.5 кг-ийн жинд Б.Чинзориг мөнгөн медаль, -67 кг жинд Б.Мишээлт хүрэл медаль хүртсэн. Эмэгтэйчүүдийн дэлхийн аварга шалгаруулах тэмцээний 48 кг-д тоглосон Л.Алтанцэцэг мөнгөн медаль, М.Энхжаргал 54 кг-д өрсөлдөж хүрэл медаль хүртсэн билээ. Тэгвэл тамирчид медалийн шагналын мөнгөө Спортын төв ордонд зохиогдсон улсын аварга шалгаруулах тэмцээний үеэр гардан авчээ. Мөн түүнчлэн, Тамирчдын амжилтыг үнэлж өнгөрөгч зун Монголын сонирхогчдын боксын холбооноос мөнгөн медальт тамирчдад хоёр өрөө байр, хүрэл медальт тамирчдад Приус авто машиныг бэлэглэсэн байдаг.