2023-2024 оны улиралд НБА-ын удирдлагуудын зүгээс цоо шинээр “Улирал дундын аваргын цом”-ын тэмцээн зохион байгуулж тэр нь нүдээ олсон шийдвэр болж олон үзэгчдийг татаад байна. Хасагдах шатанд багууд ганцхан тоглолтоор шийдэгдэж цааш өрсөлдөж буй нь үзэгчид тухайн тоглолтыг алгасахгүй үзэх шалтаан болж давхар багууд ч нэг тоглолтод байгаа бүхнээ дайчилж буй нь плэй-оффын тоглолтыг санагдуулна. 

Өнөөдөр бүсийн аваргын төлөөх тоглолтууд Лас Вегас хотод явагдлаа. Индиана Пэйсерс, Милаукий Бакс нар дорнод бүсийн тэргүүллийн төлөө тоглож эхний гурван үе эн тэнцүүхэн өрсөлдсөн ч дөрөвдүгээр үед Индиана Пэйсерсийн залуучууд тэр тундаа залуу од Тайрис Халибөртон зогсоогдошгүй байлаа. Тэрбээр 27 оноо, 15 оновчтой дамжуулалт, 7 удаа самбараас бөмбөг аван 128-129 харьцаатай ялалт байгуулахад чухал үүрэг гүйцэтгэлээ. Түүнд Майлс Турнер 26 оноо, 10 самбараар тус хүргэв.

Өрнөд бүсийн аваргын төлөө Лос Анжелес Лэйкерс, Нью Орлеанс Пеликанс багууд учраа таарлаа. Тоглолтын эхнээс өдгөө 38 настай Леброн Жэймс хэний ч төсөөлөөгүй тоглолтыг үзүүлэв. Эхний хагас гэхэд алсын зайнаас олон шидэлтүүд амжилттай гүйцэтгэж 21 оноог аль хэдийн авсан байв. Гуравдугаар үед Нью Орлеанс тоглолтыг ойртуулахыг зорьж гарч ирсэн ч тэдний хамгаалалт, довтолгоо тэр чигтээ устаж ердөө 17 оноог бүтэн үеийн турш авч, эсрэг багтаа 41 оноо алдсанаар 39 онооны зөрүүтэйгээр 4-р үе эхэлж ордны уур амьсгал дээд цэгтээ туллаа. Анх удаа зохиогдож буй тус тэмцээний аваргын цом болон үнэ цэнтэй тоглогчийн шагнал ямар чухал болохыг Леброн Жэймсийн хийж буй үйлдэл бүр харуулж байлаа. Учир нь тэр багаа удирдаж, оноо авах үедээ авч, бусад багийнхнаа тоглуулах үедээ тоглуулж гараа болон сэлгээний 6 тоглогч 10-аас дээш оноо авав. Леброн Жэймс энэ тоглотод 30 оноо, 8 оновчтой дамжуулалт, 5 самбарыг ердоо 22 минутад гүйцэтгэж онцгой тоглолт гүйцэтгэв.  Түүнд Энтони Дэвис 16 оноо, 16 самбар, 5 оновчтой дамжуулалт туслаж 133-89 харьцаатайгаар Нью Орлеанс Пеликанс багийг буулган авлаа. 

 

 

НБА-ын улирал дундын цомын тэмцээний аварга манай цагаар хоёр өдрийн дараа буюу энэ ням гарагийн 08.30 цагаас Лас Вегас хотноо тодорно. Ялсан багийн гишүүн бүр 500 мянган доллараар шагнуулах бол дэд байрт орсон багийнхан 300 мянган долларын шагнал хүртэнэ. Мөн улирлын шилдэг тоглогч болон финалын үнэ цэнтэй тоглогчийн шагналууд анх удаа эзэндээ очих өдөр тохиох нь ээ.