Германаас ирсэн 76 настай сайн дурын ажилтан Катарт тав дахь удаагийн дэлхийн аварга шалгаруулах тэмцээнд оролцож байна. Хуберт Бихлерийн хувьд Ойрхи Дорнод болон Арабын ертөнцөд анх удаа зохион байгуулагдаж буй тэмцээнийг дэмжиж байгаадаа маш их баяртай байгаагаа илэрхийлж байна. Бихлер бол энэ жилийн дэлхийн аварга шалгаруулах тэмцээнд оролцсон 20,000 гаруй сайн дурынхны нэг юм. Тэрбээр 974-р цэнгэлдэх хүрээлэнд хэвлэл мэдээллийн үйл ажиллагааг дэмжиж байна. Энэхүү цэнгэлдэх нь тэмцээн зохион байгуулдаж байгаа найман газрын нэг бөгөөд ДАШТ-ий түүхэн дэх анхны бүрэн буулгах боломжтой цэнгэлдэх хүрээлэн гэдгээрээ онцлогтой.
Түүнээс сайн дурын ажилтан хийсэн түүхээс нь тодруулсан байна. Бидэнд өөрийнхөө тухай яриач. Сайн дурын ажил нь хэрхэн эхэлсэн бэ?
- Би Франц, Швейцарьтай ойрхон Хар ойн бүсийн Германы Дуннинген хотоос гаралтай. Би бүх насаараа хөлбөмбөгт дуртай байсан. Би спорт, математикийн багшаар ажилладаг байсан ч үргэлж хөлбөмбөгийн арга хэмжээнд оролцдог байсан. Би тоглогч, дасгалжуулагч байсан. Хөлбөмбөг миний амьдралын нэг хэсэг байсан бөгөөд зодог тайлсныхаа дараа би мега арга хэмжээнд сайн дураараа оролцож эхэлсэн. Миний анхны туршлага бол 2006 онд Германд болсон хөлбөмбөгийн дэлхийн аварга шалгаруулах тэмцээн. Тэндээс л би сайн дурын ажилд дурласан.
Өмнө нь сайн дурын ажил хийж байсан туршлагаасаа хуваалцана уу?
- Би 2006, 2010, 2014, 2018, одоо 2022 онд таван ДАШТ-д сайн дурын ажилтнаар ажиллаж байна. Мөн 2011 оны эмэгтэйчүүдийн дэлхийн аварга шалгаруулах тэмцээнд сайн дурын ажилтан хийж байсан. Би заримдаа Мессигээс илүү ДАШТ-д оролцсон гэж хошигнодог.
Хэвлэл мэдээллийн сайн дурын ажилтны хувьд таны үүрэг юу вэ?
- Тэмцээнийг сурвалжлахаар ирсэн хэвлэл мэдээллийн хэрэгслүүдийн туршлага, ажиллах орчинг бид дэмжиж байна. Саяхан би Мексик-Польшийн тоглолтын үеэр зураг авахаар томилогдсон 130 гаруй гэрэл зурагчдыг удирдсан.
Катар дахь энэ удаагийн тэмцээн юугаараа онцлог байгаа вэ?
- Энэ бол Арабын ертөнцөд сайн дурын ажил хийх миний анхны туршлага бөгөөд Катар дахь хүмүүсийн өгөөмөр сэтгэл, зочломтгой байдал надад маш их сэтгэгдэл төрүүлсэн. Сайн дурын ажил миний амьдралыг маш их баяжуулдаг.
Катар 2022 оны сайн дурын ажилтан болоход юу нөлөөлсөн бэ?
- 2018 оны Хөлбөмбөгийн дэлхийн аварга шалгаруулах тэмцээн нь миний сайн дурынхны хувьд сүүлчийн арга хэмжээ болох байсан ч эхнэр маань гэнэтийн байдлаар нас барсан. Би өөр нэг сорилтыг хүссэн тул Катарт сайн дурын ажилд оролцохоор шийдсэн.
Таны сайн дурын үйл ажиллагаа өнөөг хүртэл ямар байсан бэ?
- Би Катарт олон мартагдашгүй мөчүүдийг туулсан. Дэлхийн өнцөг булан бүрээс ирсэн сайн дурынхан намайг ФИФА-гийн бусад арга хэмжээнүүдэд таних нь хамгийн том зүйл юм. Энэ дэлхийн аварга шалгаруулах тэмцээн гайхалтай, найрсаг уур амьсгалтай. Шүтэн бишрэгчид бие биенээ хүндэтгэн тайван амгалан тэмдэглэж байгааг харахад таатай байна.
Та аль багийг дэмжиж байгаа вэ?
- Миний хайртай Герман шөвгийн 16-д шалгарч чадаагүй тул би Бразилийг дэмжиж байна. Тэд гайхалтай бүрэлдэхүүнтэй, би бас олон Бразил найзуудтай.
Энэ удаагийн дэлхийн аварга шалгаруулах тэмцээнд 20,000 сайн дурынхан ажиллаж байгаагийн 16,000 нь Катарт амьдардаг хүмүүс, үлдсэн хэсэг нь гадаадын өнцөг булан бүрээс ирсэн сайн дурынхан байгаа юм.
Н.Бэлгүүн
