Бирмингемд болсон Хамтын нөхөрлөлийн наадамд Энэтхэг улсыг төлөөлөн оролцсон Мирабай Чану, Жереми Лалриннунга болон бусад хүндийг өргөлтийн тамирчид 2022 онд Бахрейны Манама хотод 10-р сарын 8-16-нд болох хүндийн өргөлтийн Азийн аварга шалгаруулах тэмцээнд оролцохоор болжээ. Парис 2024 олимпын наадмын эрх олгох тэмцээн болох хүндийн өргөлтийн дэлхийн аварга шалгаруулах тэмцээн арванхоёрдугаар сард Колумбын Богота хотод болох юм. ДАШТ-д гялалзах тамирчдыг тодорхойлох томоохон тэмцээн болох Азийн аварга шалгаруулах тэмцээн бямба гарагт эхлэх гэж байна. Тэмцээнд оролцох Монголын баг тамирчид өнөөдөр Бахрейнд очжээ. Тивийн аварга шалгаруулах тэмцээнд шигшээ багийн ахлах дасгалжуулагч Ц.Хосбаяраар удирдуулсан дөрвөн тамирчин манай улсыг төлөөлж оролцоно. Тодруулбал, 59 кг жинд Э.Энхтамир, 71 кг-д Г.Ануужин, 76 кг-д Д.Дархижав, 87 кг-д М.Анхцэцэг нар оролцох юм. Манай тамирчдын салхийг хагалж 10-р сарын 10-ны даваа гарагт 59 кг-д Э.Энхтамир өрсөлдөнө.