Голден Стэйт Уарриорс баг улирлын эхлэлийг маш сайн тавьж 12-3 гэсэн амжилттайгаар бүр Өрнөд бүсээ тэргүүлж байсан нь саяхан. Бүгд Керрийг магтан сайшааж багийнхаа бүх 15 тоглогчдыг ашиглаж, бүгдэд нь ижил тэгш хэмжээний минутыг хуваарилж балансыг маш сайн олж байсантай холбоотой гэж тайлбарлаж байсан.

Гэвч тэд сүүлийн 4 тоглолтдоо дараалан хожигдож бүсийнхээ дөрөвдүгээр байр луу ухарсан ба энэ амжилт нь энэ 12-р сард улам ч доошлох магадлалтай байгаа нь тэдний хуваариас тодорхой харагдаж байна. Нийт 12 тоглолт хийх ба тэдгээр 12 баг нь бүгд плейоффын төлөөх байранд яваа багууд байна.

Жонатан Куминга сүүлийн 6 тоглолтдоо аркны ардаас 25 шидэж ердөө 5-ыг нь унагасан бол Мозес Мүүди 16-аас 3-ыг, Брандон Подзимски 25-аас 5-ыг, Линди Уатерс 31 шидэж 9-г нь л тус тус унагаж тун муу шидэлтийн хувьтай байна. Энэ нь Керрт одоо багийнхаа үндсэн минут хангалттай авах ёстой 8-9 тоглогчдоо авч үлдэж үр нөлөөгөө бага үзүүлж буй тоглогчдоо суулгах цаг нь болсон гэдэг дохио болоод байна.

Харин багийн лидер Көрри энэ тухай ингэж хэлж ээ:

Бид одоо талбайд тоглох бүрэлдэхүүнээ цөөлөх шаардлагатай болоод байна. Бид өөрсдийн гэсэн тоглох дараалал болон ойлгомжтой байдлыг бий болгох ёстой. Тоглолтоос тоглолт бүр хэн нь хэдэн минут авах нь эргэлзээтэй байгаа тул бид ч өөрсдөө тоглолтод яаж бэлдэж орох талаар төсөөлөлгүй болоод байна. Тийм учраас магадгүй 1-2 тамирчдыг үндсэн rotation-оосоо хасах хэрэгтэй.

Түүний хэлсэн үгнээс харахад шууд нүүрэн дээр нь нэрийг нь цохохгүй байгаа ч гэсэн хасах ёстой хэд хэдэн залуус байгаа гэдгийг өөрөө таниад харчихсан байгаа бололтой.

Стив Керр ямар өөрчлөлтийг хийж энэ хүнд хуваарьтай 12 дугаар сарыг амжилттай давж гарах вэ гэдгийг харах л үлдлээ.