Лос Анжелес Клипперс багийн фенүүд төдийгүй NBA-н үзэгчид бүгдээрээ нүдээ ширгэтэл хүлээж буй тоглогч нь бол тэдний лидер хоёр удаагийн финалын үнэ цэнтэй тоглогч Кавай Леонард билээ. Тэд Кавайгүйгээр аль хэдийн улирлын дөрөвний нэгт нь буюу 21 тоглолт хийсэн ба 12-9 гэсэн амжилттайгаар бүсийнхээ 9-р байранд бичигдэж байна. Далластай хийсэн плейоффын цуврал дунд тэрээр бэртэл авч улмаар улирлаа дуусгаж баруун өвдгөндөө мэс ажилбар хийлгэж одоог хүртэл багийнхантайгаа хамт аялан тоглолтод явахгүй байгаа ба бэлтгэлд ч оролцоогүй байна.

Харин Клипперс багийн хуучин тоглогч Патрик Беверли саяхан болсон өөрийн шоуныхаа үеэр Леонардыг эргэн ирэхэд тун ойрхон байгаа хэмээн дурдсан байна.

Тэрбээр хэлэхдээ:

Би өчигдөр Кавайтай утсаар ярьсан, тэр яг л машин шиг хурдан эдгэрч байгаа гэсэн шүү. Тэр бол миний харж байсан хамгийн зүтгэлтэй, хүчин чармайлттай нэгэн. Тэр тун удахгүй талбайд гарах болно.

Түүнийг эргээд талбайд гарахыг хүсч буй мянга мянга үзэгч олон фенүүд байгаа нь дамжиггүй биз ээ. Ялангуяа тэдний шинэ ордон болох Intuit Dome-д анхны тоглолтоо хийхийг тэсэн ядан хүлээж байгаа хүн бол мэдээж Клипперсийн эзэн Стив Болмер. Кавай ирэхэд л ордон пиг дүүрч ашиг орлого нь ч тэр чинээгээрээ нэмэгдэх нь ойлгомжтой билээ. Кавай 23-24 оны улиралд 68 тоглолтод оролцохдоо 23.7 оноо, 6.1 самбар, 3.6 дамжуулалт, 1.6 таслалт болон 52.5%-ийн довтолгооны гүйцэтгэлтэй тоглож бүх NBA-ийн хоёр дугаар багт нэрлэгдэж байсан байна.

Жеймс Харден, Ивица Зубац болон Норман Повелл нар түүнийг эзгүйд багаа бүсийнхээ эхний 8 байрт байлгаж дөнгөх биз ээ.