12-р сарын 31-нд Нью Йорк Никс болон Торонто Рэпторс багуудын хооронд томоохон солилцоо болсон билээ. Торонто Рэпторс Ө.Ж Ануноби болон Прешиус Ачиуваг Нью Йорк Никс багийн РЖ Барретт, Иммануэл Күикли болон 2024 оны драфтын эрхээр солилцсон. Өнөөдөр солилцоонд орсон тоглогчид шинэ багтаа анхны тоглолтоо хийж тус бүр үүргээ сайн гүйцэтгэж ялалт байгуулсан байна.

Тодруулбал Нью Йорк Никс баг өрнөд бүсийг тэргүүлж буй Миннесота Тимбервулвс багийг талбай дээрээ хүлээн авсан ба Ө. Ж Ануноби 35 минут тоглохдоо 17 оноо, 6 самбар, 2 бөмбөг таслалт гүйцэтгэж талбай дээр хамгийн үр ашигтай тоглосон буюу +19 үзүүлэлттэйгээр багаа тэргүүлжээ. Тус тоглолтод Нью Йорк Никс 106-112 харьцаатайгаар өрнөт бүсийг тэргүүлэгчдийг буулган авсан байна. Улмаар тэд 18-15 амжилттайгаар дорнод бүсийн 7-р байранд бичигдэж явна. 

Нөгөө талд Торонто Рэпторс Кливленд Кавалиерс багийг талбай дээр хүлээн авч тоглолоо. Тус тоглолтод шинэ цэрэг Иммануэл Күикли болон нутгийнхаа багт ирсэн РЖ Барретт нар гараанд гарч тоглосон байна. Күикли 28 минут тоглохдоо 14 оноо, 6 самбар, 3 оновчтой дамжуулалт гүйцэтгэсэн бол РЖ Барретт 29 минутад 19 оноо, 9 самбар авсан ба 50 хувийн довтолгооны гүйцэтгэлтэй тогложээ. Ийнхүү тэд Кливленд Кавалиерс багийг 124-121 харьцаатайгаар буулган авч улирлын 13 дахь ялалтаа байгууллаа. Тэд дорнод бүст 13-20 амжилттайгаар 12-р байранд жагсаж яваа. Ямартай ч солилцоонд орсон шинэхэн тоглогчид аль аль багтаа уусаж, үүргээ биелүүлээд эхэлжээ.