Монголын пауэрлифтингийн нэгдсэн холбооноос жил бүр уламжлал болгон зохион байгуулдаг хэвтээ шахалтын “classic” төрлийн долоо дахь, “equipped” төрлийн 15 дахь удаагийн улсын аварга шалгаруулах тэмцээн Спортын төв оронд өнөөдрөөс эхлэн 1-р сарын 09-ны өдөр хүртэл үргэлжилж байна.

Тус тэмцээнд 23 баг, клубүүдийн нийт 240 тамирчин өсвөр, залуучууд, насанд хүрэгчид, ахмад гэсэн ангилалын 86 жинд 258 медалийн төлөө өрсөлдөж байна. Энэ тэмцээнд ДАШТ-ий 32 алт, 11 мөнгө, 16 хүрэл медальтан оролцож байгаа нь жил ирэх тусам тус тэмцээний чансаа, өрсөлдөөн улам бүр ширүүсч буйг илтгэж байна. 

Хэвтээ шахалтын УАШТ-д оролцогчдоос хамгийн өндөр амжилтыг паралимпын алт, мөнгө, хүрэл медальт, ДАШТ-ий гурван алт, дөрвөн мөнгөн медальт, дэлхийн цомын зургаан удаагийн аварга, Хөдөлмөрийн баатар, МУГТ Энхбаярын Содномпилжээ үзүүлсэн бөгөөд тэрбээр УАШТ-ээс 15 алт, дөрвөн хүрэл медаль хүртжээ.

2025 оны анхдугаар улсын аварга шалгаруулах тэмцээнээс шалгарсан тамирчид Норвеги улсад тавдугаар сарын 17-24-нд болох хэвтээ шахалтын ДАШТ-нд оролцох эрхээ авах юм. Энэ удаагийн тэмцээний эхний дээд амжилтыг өсвөр үеийнхний 66 кг-ын жинд “Скай говь” клубийн тамирчин Б.Эрхэс шинэчилсэн ба тэрбээр цээжнээс 122.5 кг-ыг шахсанаар Монгол Улсын дээд амжилтыг шинэчлэн тогтоов. Б.Эрхэс нь хэвтээ шахалтын УАШТ-д анх удаа оролцож байгаа бөгөөд өнгөрсөн оны Азийн АШТ-ээс мөнгөн медаль хүртсэн тамирчин юм.