Өнөөдөр шөнө Францын Ла Конкорд хотын цэцэрлэгт хүрээлэнд сагсан бөмбөгийн 3х3 төрлийн медалийн төлөөх өрсөлдөөн ширүүхэн болж өндөрлөлөө. 2021 оны Токиогийн олимпоос эхлэн олимпын наадамд шинээр нэмэгдсэн сагсан бөмбөгийн 3х3 төрөл олон зуун үзэгчид дунд олны анхаарал дунд өрнөв. Эрэгтэйчүүдийн хагас шигшээ тоглолтод Нидерланд Литвыг 20:9 харьцаатай бут ниргэсэн бол Олимпын эрхийн өрсөлдөөнд манайхтай учраа таарч эцсийн мөчид хожил авсан Францын шигшээ 21:14-өөр өнгөрсөн олимпын аварга Латвийг хожиж, Ла Конкорд цэцэрлэгт хүрээлэнг доргиолоо. Ийнхүү Франц, Нидерландын багууд алтан медалийн төлөө өрсөлдөхөөр болсон бол Латви, Литва нар хүрэл медалийн тулаанд тунаж үлдэв. 

Миезис Наурисаар ахлуулсан өнгөрсөн олимпын аваргууд алтан медалиас мултарсан ч тэд медальгүй харихыг хүссэнгүй. Гэвч Вингелис Сарунасаар ахлуулсан Литвачууд тэдэнд боломж олгосонгүй. Вингелис алсын зайнаас гурван удаа оновчтой довтолж, тэргүүллээ алдалгүй явсаар үндсэн цагт 21:18 харьцаатай ялалт байгуулан Литвын шигшээ багийн хүрэл медалийн тоог ахиуллаа. 

Тэдний араас талбайн давуу талыг гартаа авсан Францын шигшээ болон Ворти Де Жонгоор ахлуулсан Нидерландууд олимпын алтан медалийн төлөө үзэгчдийг суудлаа өндөлзүүлсэн гар гарсан тоглолтыг толилуулав. Тоглолтын эхлэлээс хамгаалалт зонхилсон тоглолт болж, аль аль багууд ээлжлэн оноо авсаар цаг дуусахад 1 минут дутуу байхад 13:13 дээр оноо тэнцэв. Гэхдээ шүүгч Недерландад алдаа үлээж Франц торгуулийн шидэлтээ хийсээр цаг дуусахад 17.3 секунд дутуу байхад 16-15 харьцаатай Франц илүүрхэж байлаа. Гэхдээ Францууд хоёр довтолгоо алдсан хариуг нь Ворти өршөөсөнгүй оноог тэнцүүлж, нэмэлт цагт Олимпын аваргууд тодрохоор болоход Францын хөгжөөн дэмжигчид итгэж өгөлгүй нүүрээ дарцгааж байлаа. Нэмэлт цаг!

Франц бөмбөгийг нэмэлт цагийн эхний оноог авч 17:18 болгоход Нидерландуудад алсын зайн шидэлт хийхээс өөр арга үлдсэнгүй. Тоглолт үргэлжилсээр Францын довтолгоо амжилтгүй, бөмбөг Вортигийн гарт. Мэдээж тэр шидэхээс айсангүй. Ордны тайлбарлагч “Ворти Де Жонг шидлээ, шидэлт амжилттай! тэд чадлаа. Тэд шинэхэн олимпын аваргууд боллоо” гэхтэй зэрэгцэн Нидерландууд баяраа тэмдэглэв. Гудамжны гэгдэж байсан сагсан бөмбөгийн 3х3 төрөл олимпын тавцанд гарч, өдгөө олон сая хүний үзэх дуртай спорт болоод байна.