Болгарын Софи хотод жүдо бөхийн өсвөрийн дэлхийн аварга шалгаруулах тэмцээн өнгөрөгч өдөр (8-р сарын 27) эхэлсэн. 71 орны 551 жүдоч таван өдөрийн турш зодоглохоор байгаа бол Монгол улсаас таван дасгалжуулагч 20 тамирчин оролцож байгаа юм. Тэмцээний эхний  өдөр манай улсаас охидын 40 кг-д Б.Хулан, 44 кг-д Ц.Амин-Эрдэнэ,      50 кг-д А.Бум-Эрдэнэ, 55 кг-д Б.Бадар-Ууган зодоглосон.

Тэмцээний эхний өдөр манай дөрвөн тамирчин дэвжээнд гарснаас охидын 40 кг-ын жинд “Мон-Алтиус Цагаанбаатар” академийн тамирчин Б.Хулан Монголын жүдочдийн медалийн салхийг хагалж эхний медалиар энгэрээ мялаалаа. Энэ жинд 17 тамирчин барилдсанаас Б.Хулан эхний тойрогт хийлж, дараа нь Казахстаны бөх Прякина Улянаг цэвэр ялсан ч шөвгийн наймд Узбекистаны Колучева Алинад ялагдсан юм. Улмаар дагах барилдаанд Алжирыг, хүрэл медалийн төлөө ОХУ-ын бөх Сайфутдинова Эмилиаг ялжээ.

Анх удаа ДАШТ-д тэмцээнд оролцож буй Б.Хулан-ийн хувьд 14 настай бөгөөд “Мон-Алтиус Цагаанбаатар” академи, “Мон-Алтиус” ахлах сургуульд Х.Цагаанбаатар, О.Ууганбаатар, Д.Баттүвшин нарын удирдлагад бэлтгэлээ базаадаг байна. Тэрбээр энэ жил өсвөрийн УАШТ-д түрүүлснээр ДАШТ-д зодоглох эрхтэй болсон юм.

Харин өнөөдөр (8-р сарын 28) хөвгүүдийн 60, 66, охидын 48, 52 кг-ын жингийн барилдаан болно. Манай улсаас дээрх дөрвөн жинд зургаан тамирчин дэвжээнд гарах нь ээ. Тодруулбал, 60 кг-д Н.Тэгш-Очир эхний тойрогт гоц мөргөсөн бол Б.Цолмон-Од Тайванийн Ко По-Эрхтэй, 66 кг-д Ч.Тэмүүлэн, Йорданы Азданин Ашрафтай, охидын 48 кг-д А.Мишээл Македоны Стомиловска Анамариятай, А.Хонгорзул Азербайжаны Алакбарова Лейлатай барилдах бол 52 кг-д Б.Гүндэгмаа эхний тойрогт хийлсэн бөгөөд хоёрдугаар тойрогт Киргиз, Шведийн бөхчүүдийн ялсантай барилдахаар сугалаа татжээ.