Ханжоу 2022 19 дэх удаагийн Азийн наадамж эхлээд 9 өдрийн дараах байдлаар Монгол улсын баг тамирчид 3 мөнгө, 8 хүрэл медальтай багийн дүнгээр 25-р байрт жагсаж байна.
Өнөөдөр буюу 2023.10.01-ний өдөр Монголын багийн спортын түүхэнд тэмдэглэгдэх өдөр тохиож байгаа нь Азийн наадмаас багийн төрөлд /3х3 сагсанбөмбөг/ анх удаагаа финалд шалгарч 1 мөнгө, 1 хүрэл медаль авсан өдөр тохиож байна. Мөн энэ удаагийн Азийн наадамд шинээр багтсан е спортын Дота2 төрөлд манай баг финалд шалгарч маргааш аваргын төлөө тоглолтоо хийхээр боллоо.
Ингээд манай баг тамирчид ямар төрлөөр медаль авсаныг эргэн сануулахад
Мөнгөн медаль:
Жүдо бөхийн эрэгтэйчүүдийн -66кш жинд Ё.Басхүү, -100кг жинд Б.Гончигсүрэн нар мөнгөн медаль авсан бол, 3х3 сагсанбөмбөгийн төрөлд эмэгтэй баг тамирчид мөнгөн медалийн эзэн боллоо.
Хүрэл медаль:
Жүдо бөхийн төрөлд эрэгтэйчүүдийн -73кг жинд Ц.Цогтбаатар, эмэгтэйчүүдийн +78кг жинд А.Адьяасүрэн, эмэгтэйчүүдийн -52кг жинд Л.Сосорбарам нар хүрэл медалийг хүртэж манай холимог баг мөн хүрэл медаль хүртсэн.
Эрэгтэйчүүдийн 23 хүртэлх насны 3х3 сагсанбөмбөгийн төрөлд манай эрэгтэй баг өнөөдөр хүрэл медалийн эзэд болсон.
Боксийн эмэгтэйчүүдийн 50кг жинд О.Есүгэн хүрэл медаль,
Кураш бөхийн төрлийн эмэгтэйчүүдийн -70кг жинд Ц.Батцэцэг хүрэл медаль
Буудлагын эмэгтэйчүүдийн 10м хийн гар бууны төрөлд манай баг энэ наадмын анхны медаль, хүрэл медалийн эзэд болсон.
Өнөөдрийн байдлаар манай баг тамирчид нийт 11 медаль авсан байгаа бол боксын эрэгтэйчүүдийн -63.5 кг жинд Б.Чинзоригт хүрэл медалийн болзол хангаж медалийн өнгөө хувиргах тоглолтуудаа хүлээж байна. Мөн е спортын Дота2 төрөл манай баг финалд шалгарсан бөгөөд маргааш /2023.10.02/ 19 цагаас БНХАУ-ын багтай аваргын алтан медалийн төлөө өрсөлдөнө.
