1.    Волейбол

10:30 Монгол-Афганистан хасагдах шатны тоглолт болох байсан ч цуцлагдлаа.

2.    Унадаг дугуй 

Өнөөдрийн онцлох уралдаан эрэгтэйчүүдийн засмал замын уралдаан байж ОУХМ С.Жамбалжамц тус наадмын дугуйн спортын анхны хүрэл медалийг эх орондоо авчирлаа. Тэрээр тус наадмын эхний уралдаанд шилдэг наймд шалгаран финалын шатанд өрсөлдөх эрхээ аваад байсан юм. Улмаар өнөөдөр 10:00 цагт эхэлсэн дугуйн засмал замын төрөлд 207.7 км замыг 4:31:11 хугацаанд туулан хүрэл медаль хүртэж 9 дэх хүрэл медалийг эх орныхоо нэрэн дор бичүүллээ. Түүнтэй хамт уралдсан Э.Билгүүнжаргал бариандаа амжиж ороогүй бол Б.Тэгшбаяр 4:36:15 амжилтаар бөөн гарааны 35-т орж ирлээ.     

3.    Жюү Жицү

Азийн наадмын Жюү Жицүгийн спортын төрөл өнөөдөр эхэлж манай зургаан тамирчин өрсөлдлөө. 

Эмэгтэйчүүдийн 48 кг-ын жинд өрсөлдсөн Төмөрөөгийн Уянга хүрэл медалийн төлөө Тайландын тамирчин Тан Печрада Касия-д 12-0 харьцаатай ялагдан эхний 5-р байрт шалгарлаа. Тэрбээр эхний барилдаандаа Казакстаны тамирчинг ялж, удаах барилдаандаа АНЭУ-ын тамирчинд ялагдаж, дагах барилдаанд Хятадын Ву Гуаншанийг ялснаар хүрэл медалийн төлөө шалгараад байсан юм. Тус жинд барилдсан Б.Одгэрэл эхний шатандаа Энэтхэгийн тамирчинтай барилдаж 11-0 харьцаатай ялсан ч хоёрдугаар шатанд Филиппины тамирчинд ялагдсанаар тэмцээнээ өндөрлүүллээ. 

Эрэгтэйчүүдийн 62 кг-ын жинд Ө.Эрдэнэбаатар зодоглож эхний шатандаа Филлипины тамирчинг идэвхийн оноогоор ялсан ч дараагийн шатанд АНЭУ-ын тамирчинд цэвэр ялагдав. Мөн тус жинд Б.Баяртулга өрсөлдөн Саудын Арабын тамирчинд 6-0 харьцаатай ялагдсанаар тэмцээнээ өндөрлүүллээ.  

Эрэгтэйчүүдийн 69 кг-ын жинд Э.Чинзориг эхний шатандаа Лаосын тамирчинг цэвэр ялж, 16-д Сингапурын тамирчинд ялагдлаа. Өнөөдрийн Жюү Жицүгийн сүүлчийн барилдааныг Ч.Түвдэнтарваа хүрэл медалийн төлөө хийлээ. 69 кг-ын жинд өрсөлдсөн Ч.Түвдэнтарваа хүрэл медалийн төлөө БНСУ-ын тамирчин Жоо Сонхёнтой учраа таарч ялагдал хүлээн тус жингийн шилдэг 5-т багтлаа. Өнөөдөр эхний барилдаанаа Саудын Арабын тамирчин Мухаммед Ибрахимийг идэвхийн оноогоор ялж, хасагдах шатанд Тайландын Хасде Куннапонгийн эсрэг хийн 3:0-ээр ялж, улмаар шөвгийн наймд АНЭУ-ын тамирчин Алсувайди Мухаммедед ялагдсан ч дагах барилдаанаа АНЭУ-ын бөх Яабрыг ялснаар хүрэл медалийн төлөө шалгараад байсан юм. Маргааш Жюү Жицүгийн барилдаанууд 10:00 цагаас үргэлжлэн явагдана. 

4.    Хүндийн өргөлт 

10:00 цагаас эхэлсэн эрэгтэйчүүдийн 96кг жинд А.Ичинноров эхний тойрогт 117, хоёрдугаар 145-г шахаж нийлбэр дүнгээр 16-д жагслаа. Түүний араас Б.Цолмон тус жинд өрсөлдөж эхний тойрогт 112, хоёрдугаар тойрогт 127-г өргөж нийлбэр дүнгээр 17-д жагсан тэмцээнээ өндөрлүүллээ. 

5.    Чөлөөт бөх

Азийн наадмын чөлөөт бөхийн төрөлд манай тамирчид өнөөдөр өрсөлдөж эхэллээ. 10.00 цагаас эхэлсэн тус тэмцээний салхийг хагалж Ц.Намуунцэцэг 50кг-ын жинд Энэтхэгийн тамирчинтай барилдаж ялагдал хүлээлээ. 

Чөлөөт бөхийн эхний өдөр эмэгтэйчүүдийн 53 кг, 57 кг-д медалийн төлөө манай бөхчүүд шалгарсан. 53 кг-д Б.Болортуяа хүрлийн төлөө Энэтхэгийн бөх Антимтай учраа таарч, 1:3-аар дийлдлээ. Энэ жинд Японы Акари Фүжинами БНХАУ-ын Шиан Юү Паныг оноогоор цэвэр ялснаар алтан медаль хүртсэн юм.

Харин 57 кг-д Э.Даваачимэг хүрлийн төлөө БНХАУ-ын Ке Шин Хонтой учраа таарсан. Манай тамирчин барилдааны явцад хөлөндөө бэртэл авснаар оноогоор хожигдлоо. Уг жинд дэлхийн гурван удаагийн аварга Японы Цүгүми Сакурай БНАСАУ-ын Ин Сүн Ёнтой финалдсан. Эхний үед солонгос бүсгүй дэлхийн аваргыг тэвдүүлж, 6:0-ээр илүүрхсэн ч хашир аварга дараагийн үед ажилласаар 6:7-гоор хожлоо. 

Маргааш буюу энэ сарын 6-нд эмэгтэйчүүдийн 62 кг-д С.Цэрэнчимэд, 68 кг-д Э.Дэлгэрмаа, 76 кг-д Г.Ариунжаргал, эрэгтэйчүүдийн 57 кг-д Н.Насанбуян, 65 кг-д Т.Тулга нар барилдах юм.

 

6. Шатар

15:00 цагаас Шатрын спортын багийн төрлийн 7-р тойрог үргэлжилж манай шатрын мастерууд Ираны багтай тоглон нэг ялж нэг тэнцэн 2 хожигдон нийтдээ 14.5 оноо цуглуулж хүснэгтийн наймдугаар байрт бичигдэж байна. Харин эмэгтэйчүүдийн багийн төрөлд манай эмэгтэй мастерууд БНСУ-ын багтай тоглон бүх тамирчдыг ялж 4 ялалт байгуулан 16.5 оноо цуглууллаа. Улмаар эмэгтэйчүүд хүснэгтийн 6-р байрт бичигдэж байна. Маргааш 15:00 цагаас 7-р тойргийн тоглолтууд үргэлжлэн явагдана.