БНХАУ-ын Харбин хотод “Харбин-2025” Азийн өвлийн спортын IX наадамд 34 орны 1275 тамирчин 11 спортын 64 төрөлд өрсөлдөж байна. Тус наадам 02-р сарын 07-ны өдөр эхэлсэн бөгөөд маргааш тус наадам хөшгөө хааж, медалийн тоогоор тэргүүлэгчид тодрох юм. Манай улсаас нийт дөрвөн спортын долоон төрөлд 28 багш, дасгалжуулагчийн удирдлага дор нийт 35 тамирчин өрсөлдсөн ба өнөөдөр эрэгтэй, эмэгтэй Биатлоны төрлөөр манай тамирчдын өрсөлдөөн өндөрлөж байгаа билээ.

Монголын баг тамирчид өмнө нь Азийн өвлийн спортын наадмаас нэг мөнгө, зургаан хүрэл буюу нийт долоон медаль хүртсэн бол энэ удаагийн наадмаас харамсалтай нь медаль хүртэж амжаагүй явна. Гэхдээ манай улсын тамирчид хувь болон улсын амжилтуудаа шинэчлэхээс гадна, тус наадамд үзүүлж байгаагүй онцлох амжилтуудыг тоймлон хүргэе.

Б.Гэрэлтуяа Шорт Трейкийн төрөлд хагас шигшээд уралдсан анхны Монгол тамирчин боллоо.

Шорт трейкийн эмэгтэйчүүдийн 1000 метрийн зайд Үндэсний шигшээ багийн дасгалжуулагч Б.Бат-Оргилын удирдлага дор өрсөлдсөн Б.Гэрэлтуяа хагас шигшээ уралдаанд шалгарч, монголын түүхэнд тус спортын төрөлд анх удаа шигшээ уралдаанд шалгарлаа. Б.Гэрэлтуяа шигшээ уралдаанд 1:40.249 минутын амжилтаар замаа дуусгаж, энэ гараанд дөрөвдүгээр байрт хурдаллаа. Финалын шатанд уралдах боломжгүй болсон ч нэгэн түүхийг бүтээсэн байна. Б.Гэрэлтуяагийн олон улсын тэмцээнээс медаль хүртсэн амжилтаас товч дурдвал, “Danubia Series–Sofia Open 2023” болон Тэнгсийн цом”, тэмцээнээс нийлбэр дүнгээр алт, “Deutschland cup” тэмцээнээс нийлбэр дүнгээр мөнгө, Asian Trophy олон улсын тэмцээнээс хошой хүрэл, “Sea Trophy Manila” олон улсын тэмцээнээс хошой алт, нэг мөнгөн медаль хүртсэн тамирчин юм. Мөн Б.Гэрэлтуяа нь “Харбин-2025” Азийн өвлийн спортын IX наадмын Монголын багийн тугчаар оролцсон юм.

Монголын Биатлоны эмэгтэйэ тамирчид 16-20 дугаар байрт орлоо

Тус наадмын биатлоны эмэгтэйчүүдийн 7.5 км-ын спринт уралдаанд 26 тамирчин өрсөлдөхөд Монгол улсаас Үндэсний шигшээ багийн дасгалжуулагч Ц.Мөнх-Эрдэнийн удирдлага дор дөрвөн тамирчин оролцож, 16-20 байрыг эзэллээ.

Монголын Биатлончдоос Э.Энхсайхан хамгийн өндөр амжилт үзүүлж 12-р байранд орлоо

Тус наадмын Биатлоны эрэгтэйчүүдийн 10 км-ын спринт уралдаанд 33 тамирчин оролцоход Монгол улсаас Үндэсний шигшээ багийн дасгалжуулагч Ц.Мөнх-Эрдэнийн удирдлага дор дөрвөн тамирчин өрсөлдөв. Казахстан улсын биатлончид эхний хоёр байрт орсон бол БНХАУ-ын тамирчин гуравдугаар байрт орлоо. Манай улсын баг тамирчидаас Э.Энхсайхан 12, Б.Анхболд 15, Ж.Гантулга 18, О.Гантулга 23 дугаар байрт хурдалсан юм. Монголын биатлоны баг тамирчдын хамгийн өндөр амжилтыг үзүүлсэн Э.Энхсайхан нь 2024 онд Европын залуучуудын аварга болсон бөгөөд Залуучуудын олимпын наадамд 12 дугаар байрт орсон бөгөөд “Милано-Кортина-2025” өвлийн олимпын наадмын эрхийн онооны төлөө өрсөлдөж байгаа билээ.

Монголын гүйлтийн цанын эмэгтэй баг тавудгаар байрт шалгарав

Харбин Азийн өвлийн спортын IX наадмын зургаа дахь өдөр гүйлтийн цанын буухиа төрөлд Эмэгтэйчүүдийн төрөлд зургаан орны баг уралдсан бөгөөд манай улсын цаначид тавдугаар байр буюу Ираны багийн өмнө оржээ. Үндэсний шигшээ багийн дасгалжуулагч Ц.Мөнх-Эрдэнийн удирдлага дор Монголын гүйлтийн цанын буухиа төрөлд М.Должинсүрэн, Х.Эрдэнэтунгалаг, Х.Сумъяа, Д.Энхчимэг нар уралдлаа.

Монголын цанын баг буухиа төрөлд тавдугаар байрт шалгарлаа

БНХАУ-ын Харбин хотод Азийн өвлийн спортын IX наадмын зургаа дахь өдөр эрэгтэйчүүдийн гүйлтийн цанын буухиа (4x10 км) төрөлд есөн орны баг өрсөлдлөө. Тэмцээний эхний байрт БНХАУ-ын баг орсон бол удаах байрт Япон, Казахстаны цаначид оров. Монголын цаначид алтан медаль хүртсэн багаас 8 минутын дараа бариалснаар тавдургаар байр эзэлж, Иран, Энэтхэг, Тайланд, Тайванийн багийн өмнө жагслаа.

Уран гулгалтын төрөлд тамирчин Г.Марал-Эрдэнэ 16-р байранд, О.Мишээл 19-р байрт бичигдэж байна

“Харбин-2025” Азийн өвлийн спортын наадмын зургаа дахь өдөр уран гулгалтын эмэгтэйчүүдийн ганцаарчилсан төрөлд 25 тамирчин оролцсон ба манай улсаас дасгалжуулагч Рина Хорегийн удирдлага дор Г.Марал-Эрдэнэ (30.64 оноо), дасгалжуулагч Тэцүкацү Накашимагийн удирдлага дор О.Мишээл (26.32 оноо) нар өрсөлдлөө.

Өнөөдрийн богино үзүүлбэрийн дараах байдлаар ДАШТ-ийн гурван удаагийн аварга, олимпын хүрэл медальт Каори Сакамото (75.03 оноо), ДАШТ-ий хүрэл медальт Ким Чае Ёон (71.88 оноо) нар тэргүүлж байна. Харин Монголын тамирчин Г.Марал-Эрдэнэ 16, О.Мишээл 19 дүгээр байрт бичигдэж байна. Өнөөдөр чөлөөт үзүүлбэрийн дүн гарсанаар медалийн эзэд тодорно.

Г.Марал-Эрдэнэ Азийн наадамд хоёр дахь удаагаа оролцсон бол О.Мишээлийн анхны Азийн наадамд туршлага сууж байгаа нь энэ болж байна. Өнөөдөр О.Мишээл зургаа дахь гараа, Г.Марал-Эрдэнэ ес дэх гараанд гарч үзүүлбэр үзүүлнэ.

Монголын уран гулгалт, шорт трейк, гүйлтийн тэшүүрийн баг Азийн наадамд анх удаа бүрэн бүрэлдэхүүнээрээ оролцсон нь манай улсын өвлийн наадмын анхдагч болж бүртгэгдэж байна.

Гэрэл зургийг: Биеийн тамир спортын улсын хороо