Монголын сагсан бөмбөгийн “Үндэсний дээд лиг” эргэн ирлээ. Үндэсний дээд лиг анх 1994-95 оны улирлаар эхэлж байсан түүхтэй бөгөөд Хасын хүлэгүүд баг нийт 9 удаа аварга авч байсан амжилтаар тэргүүлдэг байна. Өнгөрсөн жил хүснэгтийн 9 болон 10-р байрт шалгарсан ИНҮТ Yes TLG болон Налайх Бизон багууд хөгжлийн лиг рүү унасан бөгөөд хөгжлийн лигт аварга авсан Ховд шонхорууд болон хөгжлийн лигийн гуравдугаар байрт шалгарсан Монголианс багууд эрхээ авч, дээд лигт өрсөлдөхөөр боллоо.
Энэ жилийн үндэсний дээд лигийн онцлог:
· Үндэсний дээд лигийн багууд нэмэлтээр Ази тивийн найман улсаас легионер тоглогч авч болохоор болсон байна. Талбай дээр хоёр легионер тоглогч байх бөгөөд 1 болон 4-р үеүүдэд ази легионер тоглогч тоглоно.
· Мөн цомын тэмцээн зохиогдох бөгөөд дээд лигийн багууд дээр нэмэгдэж хөгжлийн лигийн багууд хасагдах журмаар тоглолт явагдана.
