МУГТ Нямбаярын Төгсцогт ээлжит тулаанаа Колумбийн боксчин Оскар Эскандонтой хийхээр болжээ. Ирэх 7-р сарын 26-нд Миссисипи мужийн “Билокси”-д тулаан болохоор товлогджээ. 

Хоёр тамирчны хувьд хоёулаа сонирхогчдын боксоос спортын замналаа эхлүүлж, хоёул олимпын наадамд өрсөлдөж байсан бол Оскарын хувьд манай тамирчнаас насаар ахимаг. Тэрбээр 2004 оны Афины олимпийн наадамд оролцож, шилдэг 16-нд шалгарч байсан төдийгүй мэргэжлийн бокст шилжсэнээсээ хойш 25 ялалт байгуулж, гурван удаа ялагдаж байжээ.

2023 оны тавдугаар сард WBC холбооны хагас хөнгөн жин буюу 57.2 кг-ын жинд аваргын бүсийн төлөө Гэри Расселтай Оскар Эскандон тулалдаж байжээ. Долдугаар үед техникийн нокаутаар Оскар ялагдсан ч хүчтэй цохилтуудаараа шаггүй өрсөлдөгч гэдгээ харуулаад амжсан байна.

“Боксрек”-ийн чансаанд манай тамирчин 23-т, О.Эскандон 11 дүгээрт эрэмбэлэгдэж байна. Н.Төгсцогт хэрвээ ялалт байгуулбал Гэри Расселтай тулах магадлал өндөр болох юм.

Монгол Улсын гавьяат тамирчин, сонирхогчдын боксын олимпын наадам, дэлхийн АШТ-ий мөнгөн медальт, мэргэжлийн боксын IBO холбооны 57,2 кг жингийн дэлхийн аварга болж байсан, мэргэжлийн рингэнд 15 тулаан хийсэн "King Tug" Нямбаярын Төгсцогтын сүүлийн тулаан 2 жилийн өмнө АНУ-ын Нью Жерси мужийн Атлантик сити хотноо "Borgata Hotel& Casino, spa" цогцолборт Намиби улсын боксчин "Цөлийн шуурга" хочит Сакариа Лукастай хийж, тэнцсэн байдаг. Түүнээс хойш дахин рингэнд гарч, албан ёсны тулаан хийгээгүй байсан Н.Төгсцогт ийнхүү спортдоо эргэн ирлээ.

Н.Төгсцогтын хувьд 2015 оны 3-р сарын 3-нд 23 настайдаа мэргэжлийн бокст анхны тулаанаа хийж, тэр цагаас хойш 2022 оныг хүртэл 7 жил мэргэжилд өрсөлдөж, 12 ялж, 2 ялагдаж, 1 тэнцсэн үзүүлэлттэй байгаа юм. 

Манай тамирчны хувьд 57.2 кг-ын жинд WBA-ын аварга цолыг Мексикийн Лео Санта Круз, WBC-ын АНУ-ын Гэри Расселл, IBF-ын аваргы цолыг Английн тулаанч Ли Селби,  WBO-д Мексикийн Оскар Вальдез эзэмшиж байна.

7-р сарын 16-нд болох тулааныг “FOX Sport” телевизийн нэгдүгээр сувгаар шууд дамжуулна.