Унгар улсын Дебрецен хотноо болсон “Парис 2024” олимпын 3х3 сагсанбөмбөгийн эрх олгох сүүлчийн тэмцээнд Монголын эрэгтэй, эмэгтэй багууд оролцож, тэмцээний эцсийн мөчид харамсалтай нь ялагдал хүлээв. Тэгвэл эрх олгох 3х3 сагсанбөмбөгийн тэмцээн өндөрлөснөөс хэдхэн цагийн дараа Монголын сагсан бөмбөгийн холбооны ерөнхийлөгч Г.Батцэнгэл хариуцлага хүлээж, үүрэгт ажлаа өгөх болсноо олон нийтэд мэдэгдлээ.

Тэрбээр өөрийн цахим хуудсаараа дамжуулан:

"Дүрэм журам, ёс зүйн зарчмыг тамирчдадаа ойлгуулан, хэвшүүлэх нь бидний үүрэг юм. Олимпын эрхийг авч чадаагүйн хариуцлагыг миний бие дангаараа бүрэн хариуцаж Монголын сагсан бөмбөгийн холбооны (МСБХ) ерөнхийлөгчийн үүрэгт ажлаас чөлөөлөгдөх хүсэлтээ гаргах болно. МСБХ-ны дүрмийн дагуу эрх бүхий дэд ерөнхийлөгч холбооны цаашдын ажлыг Удирдах зөвлөл, ерөнхий нарийн бичгийн даргын ажлын албаны хамт хариуцан ажиллана. Өнөөдрийг хүртэл сагсанбөмбөгийн хөгжлийн төлөө хамтран ажилласан хамт олон, хөгжөөн дэмжигчдэдээ баярлалаа Монгол Улс үүрд мандан бадраг" хэмээн нийтэлжээ.