Кавсын гайхалтай цуврал үргэлжилсээр. 13-0 амжилттай Дорнодыг тэргүүлж байна. Багийн түүхэн дэх хамгийн олон хожлын цувралтайгаа ийнхүү тэнцсэн байна. Их гурвал нь эзгүй Филлигийн залуучууд тун сайн тоглов. Энэ оны драфтын 16 дахь сонголт Жаред Мккэйн 34 оноо, 10 дамжуулалттай дабл дабл гүйцэтгэж, замналыхаа дээд оноог авсан ч Кавсын нэг ч хожигдолгүй цувралыг зогсооход хангалтгүй байлаа. 

Вэмбигийн галзуу үдэш Спөрст дахин нэг хожил авчирлаа. Вашингтон 130-139 Сан Антонио. Виктор Вэмбаньяама 50 оноо /замналын дээд амжилт/, 6 самбар, 8 удаа алсын зайнаас /замналын дээд амжилт/ амжилттай гүйцэтгэв. Спөрсөөс 50 оноонд хүрсэн хамгийн залуу тоглогч, NBA-ийн түүхэнд 50 оноонд хүрсэн 4 дэх залуу тоглогч /Брэндон Женнингс, Леброн Жэймс, Девин Бүүкер/, 50 оноонд хүрэхдээ 8 удаа алсын зайн шидэлт амжилттай болгосон NBA-ийн хамгийн залуу тоглогч болж байна. 

Милаукий Баксийг Яннис нуруундаа үүрсээр. Детройт Пистонсийн эсрэг нэмэлт цаг сунгасан хүнд тоглолтын эцэст Бакс 127-120 харьцаатай буулгаж авлаа. Яннис 59 оноо авсан, Бакс энэ улиралд анх удаа хоёр тоглолт дараалан хожсон, Исайа Стюарт Яннис дээр хүнд алдаа хийж хөөгдсөн, рүүки тоглогч Рон Холланд нэмэлт цаг сунгах шаардлагагүй хожих боломжтой хоёр чөлөөт шидэлтээ алдсан гээд сонирхолтой тоглолт болж өндөрлөв.

Жэйсон Тэйтумд трипл дабл хийхэд ганцхан самбар дутсан тоглолтод Нетсийг 139-114 харьцаатай бут ниргэв. Тэйтум 36 оноо аван багаа хожилд хөтөлсөн ба Бостоны бүрэлдэхүүн энэ жил зузаан байгаагаа харуулсан тоглолт боллоо. Талбай дээр сүүлийн минутаас өмнө гарсан бүх тоглогчид оноо авахын хажуугаар 7 тоглогч 10 болон түүнээс дээш оноо авчээ. 

Рокетс гурав дараалсан хожилоо авлаа. Өнөөдөр Клипперсийг 111-103-аар хожиж 6 дахь ялагдлыг нь амсуулав. Рокетсийн сэлгээ давуу байдал авчирч, Жэйлен Грийн тоглолтыг гартаа авч 21 оноо, 7 самбараар багаа тэргүүлэв. 

КАТ-ын 46 оноо, 10 самбартай дабл дабл хийсэн гайхалтай шөнийг Зак Лавайн болон Коби Уайт үгүй хийв. Брансон хожлын довтолгоо хийсэн ч Хартын алдаанаас болж Уайт гурван чөлөөт шидэлтээ бүгдийг нь амжилттай болгосноор Буллс 124-123 харьцаатай улирлын тав дахь хожлоо байгууллаа. 

Багийн чухал тоглогчдоо бэртэлд алдсан Пеликансийн улирлын эхлэл тун тааруу үргэлжилсээр. Өнөөдөр өрнөдийг шилдэг багуудын нэг ОКС-д хожигдсоноор 6 тоглолт дараалан ялагдал хүлээлээ. ОКС Өрнөдийг тэргүүлж эхлэв. 

Хамгаалалт ямар чухал болохыг Орландо өнөөдөр Индианад харуулав. Улиралд 110+ оноо дунджилж байсан Индиана өнөөдөр 94-90 харьцаатай ялагдал хүлээлээ. Халибөртон өнөөдөр Мэжикийн хамгаалалтаас мултарч чадсангүй 4 удаа бөмбөгөө алдсан байна. 

Сакременто талбай дээрээ Сансыг төвөггүй буулгаж авлаа. Кингс 127-104 Санс. Сабонис ээлжит нэгэн дабл дабл, Фокс 29 оноо, 10 дамжуулалттай багаа тэргүүлэв. 

Шэйдон Шарп Портлэндэд гялалзсан үдэш байлаа. Портланд Тимбервулвсыг талбай дээрээ хүлээж авсан тоглолтод 106-98 харьцаатай буулгаж авав. Шарп 33 оноо, 6 самбар гүйцэтгэж, Портландчуудын сэтгэлийг хөдөлгөлөө.

Леброн Жэймс гурван тоглолт дараалсан Трипл дабл гүйцэтгэж Мемфисийн залуучуудыг буулгаж авав. 35 оноо, 14 дамжуулалт, 12 самбар. Мэдээж 41 насандаа тус амжилтыг үзүүлсэн хамгийн цорын ганц тоглогч болж байна.