Монголын холимог тулааны тамирчдын чансаа тогтоох зорилготой “MGL-1 Fight Night 7” Баянхонгор аймагт зохион байгуулагдахаар болсон байна.
Энэхүү тэмцээнд мэргэжлийн 4, сонирхогчдын 2 тулаан болохоор товлогдсон бөгөөд шилдэг залуу тулаанчид ур чадвар, хүч чадлаа харуулж, “MGL-1” холбооны албан ёсны чансаанд бичигдэх эрхийн төлөө өрсөлдөх юм. Сонирхолтой тулаанаас дурьдвал -70 кг-ын жинд One Team Fighting Club-ын тамирчин Э.Баттулгатай өрсөлдөх тамирчин гэмтлийн улмаас оролцох боломжгүй болсон тул олноо Жалам хар нэрээрээ алдаршсан Ө.Баярмандах богино дуудлага хүлээн авч хүч үзэхээр болсон аж.
Тус тэмцээнийг “MGL-1” буюу Монголын тулааны шилдэг тамирчдын холбоо болон Гурван бүсийн холимог тулаанчдын холбоо хамтран зохион байгуулж буй юм.
“MGL-1” холбооны хувьд 2009 онд байгуулагдсан бөгөөд хамгийн сүүлд буюу 2025 оны зургаадугаар сард олон улсын шилдэг тулаанчид хүч үзсэн “MGL-1 FIGHTING CHAMPIONSHIP” аваргын бүсний төлөөх тэмцээнийг 22 дахь удаагаа амжилттай зохион байгуулсан юм. Харин Гурван бүсийн холимог тулаанчдын холбоо нь 2022 онд үүсэн байгуулагдаж, анхны тэмцээнээ 5 дугаар сард Баянхонгор аймагт зохион байгуулж байжээ. Энэ удаа дээрх хоёр холбоо хамтран “MGL-1 Fight night 7” тэмцээнийг ийнхүү Баянхонгор аймагт зохион байгуулахаар шийдвэрлэжээ.
“MGL-1 Fight night 7” тэмцээн нь энэ бямба гарагт буюу 10 дугаар сарын 18-ны өдөр Баянхонгор аймгийн Спортын ордонд болох юм байна.
