Сагсан бөмбөгийн 3х3 төрлийн хамгийн нэр хүндтэй тэмцээнүүдийн нэг болох Дэлхийн аварга шалгаруулах тэмцээн Польш улсын нийслэл Варшав хотноо 6-р сарын 1-7 ний өдрүүдэд зохиогдох гэж байна.

Тус тэмцээнд манай Монгол улсын эрэгтэй шигшээ баг зургаа дахь удаагаа оролцох гэж байна. Манай шигшээ баг 2018 онд Чехт болсон ДАШТ-д анх удаа оролцохдоо шигшээ 8-д үлдсэн нь хамгийн өндөр амжилт болж байжээ. Энэ удаагийн ДАШТ-ий эрэгтэй төрөлд нийт шилдэг 20 орны баг тамирчид дөрвөн хэсэгт хуваагдан өрсөлдөнө. Монгол улсын эрэгтэй шигшээ багийн хувьд тэмцээний B хэсэгт АНУ, Латви, Чех, тэмцээнийг зохион байгуулагч Польш улсын багуудтай учраа таарчээ.

Монголын эрэгтэй шигшээ багийн бүрэлдэхүүн:

-Дэлхийн чансааны №51 А.Ананд

-Дэлхийн чансааны №121 Г.Дөлгөөн

-Дэлхийн чансааны №139 Г.Болор-Эрдэнэ

-Дэлхийн чансааны №969 Э.Сугар-Очир нар багтсан байна.

Тус тэмцээнд манай Монгол улсын эмэгтэй шигшээ баг тав дахь удаагаа оролцох гэж байна. Өнгөрсөн жил Монгол улсын нийслэл Улаанбаатар хотноо манай эмэгтэй шигшээ баг нутаг дээрээ дэд аварга болж, ДАШТ-ий хамгийн өндөр амжилтаа үзүүлж байлаа. Энэ удаагийн ДАШТ-ий эмэгтэй өрсөлдөөнд нийт шилдэг 20 орны баг тамирчид дөрвөн хэсэгт хуваагдан өрсөлдөнө. Монгол улсын шигшээ багийн хувьд тэмцээний B хэсэгт Испани, АНУ, Унгар, Австралийн шигшээ багуудтай учраа таарчээ.

Монголын эмэгтэй шигшээ багийн бүрэлдэхүүн:

-Дэлхийн чансааны №13 О.Хулан

-Дэлхийн чансааны №21 Б.Ариунцэцэг

-Дэлхийн чансааны №62 Б.Болор-Эрдэнэ

-Э.Нарангоо нар багтсан байна.