Өнөөдөр өглөө Парисын олимпын эрэгтэйчүүдийн сагсан бөмбөгийн хагас шигшээд шалгарах эрхийн төлөөх өрсөлдөөн АНУ болон Бразилын тоглолтоор өндөрлөлөө. Тус тоглолтод шилдэг бүрэлдэхүүнээрээ ирсэн АНУ-ын шигшээ Бразилийг 122:87 харьцаатай төвөггүйхэн буулган авч, шөвгийн дөрөвт шалгарлаа. АНУ ямар зорилготой ирсэн гэдгийг бүгд мэдэж байгаа. Энэ дунд нэг тоглогч бусдаасаа илүү гялалзаж явна. Тэр бол олимпын гурван алтан медальт Кевин Дурант.  

Өнөөдрийн тоглолтод тэрбээр АНУ-аа төлөөлөн 11 оноо авсан ба тэрбээр АНУ-ын далбаан дор олимпын наадамд нийт 494 оноо бүртгүүллээ.

Энэ нь АНУ-ын эрэгтэй, эмэгтэй сагсан бөмбөгийн тамирчдын түүхэнд олимпын дэвжээн дээр хамгийн их оноо авсан амжилт болж, бүх цаг үеийн мэргэн бууч болсон байна. Кевин Дурантаас өмнө тус амжилтыг АНУ-ын эмэгтэй сагсан бөмбөгийн од, олимпын дөрвөн удаагийн алтан медальт Лиза Лесли эзэмшиж байсан ба 488 оноог өөрийн нэр дээр эзэмшдэг юм. 

Өдгөө 35 настай Кевин Дурант энэ амжилтыг эвдсэнийхээ дараа өөрийн цахим хуудсаараа дамжуулан:

“Энэхүү дээд амжилтыг эвдэх зорилготой, өөр гайхалтай тоглогч гарч ирээд намайг давж гарах хүртэл би энэ амжилтыг ахиулах болно. Лиза Лесли бол сагсан бөмбөгийн алтан стандарт, олон жилийн турш үзүүлсэн таны хайр, дэмжлэгт баярлаж байна. Юу ч болсон үргэлж хайртай байх болно. Энэ бүгд мэдээж алтын төлөө. Үүнийг авцгаая андуудаа” хэмээн нийтэлж, доорх зургийг оруулжээ.

Финалд шалгарах эрхийн төлөө АНУ-ын баг Сербитэй учраа таарсан. Олимпын хэсгийн тоглолтод тэд учраа таарч, АНУ тэднийг 110-84 харьцаатай буулгаж авсан бол олимпын өмнөх нөхөрсөг тоглолтод 105-79-ийн харьцаатай хожсон билээ.