NBA-н цомын төлөөх тэмцээн энэ жил хоёр дахь удаагаа амжилттайгаар зохион байгуулагдаж байгаа бөгөө шигшээ тоглолтод өрсөлдөх хоёр багийн нэрс өнөөдөр тодорлоо.

Өнгөрсөн шөнө буюу манай цагаар 15-ны 05:30 минутаас эхэлсэн Милуаки Бакс vs Атлана Хавкс гэсэн Дорнод бүсийн финалын тоглолтод Яннисаар ахлуулсан Бугууд 110-102 харьцаатайгаар Лас Вегас хотод хожил байгууллаа. Грек Мангас багаа манлайлж 32 оноо, 14 самбар, 9 дамжуулалт, 4 хаалт гүйцэтгэж зогсоогдошгүй байсан бол Лиллард багийн хоёр дахь лидерийн үүргийг тун сайн биелүүлж 25 оноо, 7 дамжуулалт, 6 самбар, 5 удаа гурваас унагаж ээ. Тоглолт эцсийн мөч хүртэл оноо ойрхон дээр доороо оролцож тун өрсөлдөөнтэй явж байсан ч тоглолтын төгсгөлийг Дейм Тайм болон Грек Фрийк нар илүүрхсэн байна.

Хавксаас Трей Янг 18 довтолж 9-ийг нь амжилттай болгож 35 оноо, 10 дамжуулалт, 7 самбар авч улирлын шилдэг тоглолтоо үзүүлсэн ч харамсалтай энэ нь хожиход хангалттай байсангүй.

Тус тоглолтын дараа нэг сонирхолтой үзүүлэлт дагаж байгаа нь Баксын шинэхэн туслах дасгалжуулагч, Лейкерсийг экс ахлах дасгалжуулагч Дарвин Хам цомын тэмцээний финалд хоёр удаа шалгарсан цор ганц эрхэм болоод байна. Ноднин жил Лейкерстэйгээ аварга авсан бол энэ жил Бакстайгаа мөн л шигшээ тоглолтод оролцохоор бэлэн болоод байна. Хэрэв Бакс аварга болох юм бол энэ тэмцээнийг Дарвин Хамын нэрэмжит болгож нэрийг нь өөрчлөх хэрэгтэй.

Харин Өрнөд бүсийн финалын тулаанд Лигийг хамгаалалтын үзүүлэлтээрээ нэгт (ОКС), хоёрт (Рокетс) бичигдэж байгаа хоёр залуу багийн тулаан болж өндөрлөлөө. Тийм дээ ч эхний хагас цэвэр хамгаалалт дээр зонхилсон оноо авалт маш багатай хагас болж хоёр баг нийлээд ердөө 83 оноог авч 42-41 харьцаатай өндөрлөсөн билээ. Гэвч Шей болон түүний нөхөд хоёр дугаар хагаст довтлох учраа олон Рокетсийн хамгаалалтыг төвөггүй сэтэлж бүх шидэлтээ унагаж 70 оноог авч Рокетсийг илт илүүрхэж улмаар финалд шалгараад байна. Канад залуу SGA өнөөдөр багаа манлайлж 32 оноо, 8 самбар, 6 дамжуулалт, 5 таслалт хийсэн бол эсрэг талаас нэг ч тоглогч 20+ оноонд хүрч чадаагүй байна. Рокетсийн хувьд энэ улиралд дутагдаж байгаа ганцхан зүйл бол оноог төвөггүй авдаг довтолгооны од тоглогч л дутагдаж байна даа. Бусдаар бол багт хэрэгтэй тоглогчид цөм бүрэн байгаа билээ.

Эмиратын нэрэмжит NBA-н цомын төлөөх тэмцээний шигшээ тоглолт манай цагаар 12-р сарын 18-ны өглөө 09 цаг 30 минутаас эхлэх хуваарьтай байна.

Таны бодлоор аль баг нь хоёр дахь удаагийн аварга багаар тодрох бол гэж бодож байна?