Нийслэлийн бүх ЕБС-ийн сургуулиудын дунд зохиогдож буй Улаанбатар Кап тэмцээнтэй Монголын Пайретс сагсан бөмбөгийн клуб албан ёсоор хамтран ажиллаж эхэллээ. Улаанбаатар кап тэмцээн нь Сагсан бөмбөг, Волейболын төрлөөр 10,000 гаруй сурагчид нийт зургаан сарын хугацаанд мэргэжлийн лигийн журмаар өрсөлдөж, аваргуудаа тодруулах юм.

Пайретс сагсан бөмбөгийн клуб нь сагсан бөмбөг тэр дундаа эмэгтэй сагсан бөмбөгийг Монгол улсад хөгжүүлэх, дотоодын өрсөлдөөн болон олон улсад чадварлаг тамирчдыг бий болгох зорилготой. Энэхүү зорилгын хүрээнд дотооддоо олон сургалт хөтөлбөрүүд хэрэгжүүлдэг ба Үндэсний Дээд лигт Mongolian Pirates Basketball Club-ээрээ өрсөлдөж байна. Ийнхүү Пайретс сагсан бөмбөгийн клуб нь өсвөр насны эмэгтэй хүүхдүүдийг Улаанбаатар кап тэмцээнээр дамжуулан сагсан бөмбөгт бага наснаас нь дурлуулж, чадварлаг, мэдлэгтэй, соёлтой, хүмүүжилтэй тамирчдыг бэлтгэхэд дэмжлэг үзүүлэхээр Улаанбаатар Кап тэмцээний эмэгтэй сагсан бөмбөгийн төрөлд Platinum хамтрагчаар ажиллахаар боллоо.

Пайретс Спорт Менежмент ХХК-ий гүйцэтгэх захирал Н.Эрдэнэпүрэв Улаанбаатар Кап тэмцээнтэй хамтрах болсон талаар:

"Анх 2024 онд охиноо сагсан бөмбөгийн клубт явуулах үед эмэгтэй сагсан бөмбөгийн хөгжил эрэгтэйчүүдээсээ илүү орхигдож буйг анзаарсан. Улмаар дөрвөн найзынхаа хамтаар Пайретс сагсан бөмбөгийн клубийг байгуулж, эмэгтэйчүүдийн хөгжилд түлхүү анхаарах болсон. Тиймдээ ч эмэгтэй сагсан бөмбөгийг хөгжүүлэх сонирхолтой нийцэж буй Улаанбаатар Кап тэмцээнтэй хамтарч ажиллахдаа таатай байна" гэжээ.

Энэхүү хамтын ажиллагааны хүрээнд Пайретс сагсан бөмбөгийн клубын зүгээс Улаанбаатар Кап тэмцээнд оролцож буй охидуудад олон боломжуудыг бий болгох юм.

• Залуу тамирчдыг мэргэжлийн клубын бэлтгэлд урьж оролцуулах, уур амьсгалыг мэдрүүлэх
• Эмэгтэй багуудын шилдэг тоглогч нарт Pirates Basketball club-д элсэх эрх олгох
• Ахлах ангиллын эмэгтэй шилдэг тоглогч нарыг клуб-д элсүүлэх. 
• Пайретс сагсан бөмбөгийн мерчендайз бүтээгдэхүүнээс бэлэглэх
• Америк Европт явагддаг шилдэг дасгалжуулагч нарын зуны сургалтад Улаанбаатар Кап тэмцээнд оролцсон шилдэг хүүхдүүдийг сургах зэрэг олон таатай нөхцөлүүдээр дэмжиж ажиллахаар боллоо.

Дашрамд дурдахад Үндэсний Дээд лигийн Mongolian Pirates Basketball Club баг нь өмнөх хоёр улиралд хүлээсэн амжилтад хараахан хүрч чадаагүй бол энэ улирлаас эхлэн цоо шинэ менежмент, удирдлагуудтай болсноор тэдний амжилт огцом нэмэгдэж, одоогийн байдлаар 8-5 амжилттайгаар 2-р байранд бичигдэж байна. Мөн МСБХ-ны Холбооны цомын тэмцээний Финалд шалгараад байгаа билээ.