Бүгд Найрамдах Киргиз улсын Чолпон-АТА хотод 08-р сарын 21-26-ны хооронд зохион байгуулагдсан гир өргөлтийн Дэлхийн аварга шалгаруулах тэмцээнээс Монгол улсын тамирчид нийтдээ 5 алтан медаль хүртжээ. Дэлхийн 36 орны 900 гаруй тамирчин өрсөлдсөн уг тэмцээнд манай улсаас 4 эмэгтэй, 4 эрэгтэй нийт 8 тамирчин өрсөлдсөн байна. Энэхүү тэмцээн нь залуучууд, U23, насанд хүрэгчид, ахмад гэх мэт бүх насны хүрээнд сонирхогчдын болон мэргэжлийн ангиллаар зохиогдов.

ОХУ-ын Костома хотын Цацраг, хими, биологиос хамгаалах цэргийн академийн 4 дүгээр дамжааны сонсогч, дэд ахлагч Э.Буджав 68 кг жинд огцом, түлхэлттэй өргөлтөөр хос алтан медаль хүртсэн ба “Мэргэжлийн” төрөлд Монгол улсын түүхэнд анх удаа хүрэл медалийн эзэн боллоо.

ҮБХИС-ийн ЦНДС-ийн Цэргийн холбооны инженерийн 4 дүгээр дамжааны сонсогч Б.Ундрах 68 кг жинд урт болон богино тольчок ангилалд түрүүлж, хос алтан медалиар шагнууллаа. 

Зэвсэгт хүчний 330 дугаар ангийн алба хаагч, ахлах ахлагч Э.Ирээдүй 95 кг жинд Сонирхогчдын Дэлхийн аваргын ривок төрөлд алтан медаль хүртэв.

Сонирхогчдын Дэлхийн аваргаас Ү.Цэвэгням бетлоны төрөлд алтан медаль хүртсэн байна. 

Сонирхогчдын Дэлхийн аваргаас Ц. Нансалмаа 2024 онд бетлон төрөлд мөнгөн медаль

Сонирхогчдын Дэлхийн аваргаас Б.Баярсайхан 2024онд Бетлон төрөлд алтан медаль, Длтницикл төрөлд мөн алтан медаль хүртжээ.

Сонирхогчдын Дэлхийн аваргын Амхад насны ангилалд оролцсон 2022 оны Азийн хошой аварга, 2023 оны Дэлхийн аваргын алт, мөнгөн медальт С. Туяацэцэг 2024 оны Дэлхийн аваргаас дахин алт, мөнгөн медаль хүртлээ. 

Дэд ахлагч Э.Буджав, ахлах ахлагч Э.Ирээдүй, сонсогч Б.Ундрах нар 2023 онд гийр өргөлтийн Дэлхийн аваргаар шалгарч байсан юм. Тэд Дэлхийн данстай тамирчид гэдгээ энэхүү дэлхийн аваргаар дахин батлан харуулжээ. Өмнө нь 2023 оны 9-сард Бүгд Найрамдах Узбекстан Улсад зохион байгуулагдсан гир өргөлтийн Дэлхийн аварга шалгаруулах тэмцээнээс дэд ахлагч Э.Буджав хоёр алт, нэг мөнгө, сонсогч Б.Ундрах гурван алт, нэг мөнгө, ахлах ахлагч Э.Ирээдүй нэг алт, нэг хүрэл медаль хүртсэн юм. Дэд ахлагч Э.Буджав 2022, 2023, 2024 онд дараалан, энэ төрөлд Дэлхийн аварга болж байна.

Ташрамд дурдахад ОХУ-аас гаралтай гирийн спорт (гиревой спорт) -ыг олон улсад “Kettlebell lifting” буюу данх өргөлт хэмээн нэрлэдэг аж. Энэ нь хүндийг өргөлтийн спортын нэг төрөл бөгөөд гирийг дээш огцом өргөхөөс гадна олон төрлөөр хичээллэж болдог байна. Гирийн гол онцлог нь Гирээ хаана ч авч яваад хичээллэх боломжтой. Гэртээ хийж болно. Хөдөө, гадаа ч аваад явж болно. Хүний биеийн бүх хэсгийн булчин зэрэг хөдөлнө. Зүрх судас, уушги гээд дотор эрхтнүүдэд эерэг нөлөөтэй гээд олон төрлийн давуу талтай спорт ажээ.