Өнөөдөр манай баг тамирчид багийн 4 спорт, ганцаарчилсан 4 төрөлд өрсөлдлөө. Байт харвааны төрөлд манай эрэгтэй баг энэ жилийн Дэлхийн цомын эзэн болсон зохион байгуулагч орон болох БНХАУ-ын багийг 5:1 харьцаатай буулган авч шигшээ наймд шалгарлаа. Харин өнөөдрийн оргил тоглолт болох ИСпортын Дота2 төрөлд манай шигшээ хүчирхэг БНХАУ-ын багтай тоглож хүч тэнцүү өрсөлдсөний эцэст 2-1 харьцаатай ялагдаж түүхэндээ анх удаа мөнгөн медалийн эзэд боллоо. 

1.    Хүндийн өргөлт 

10:00 Эмэгтэйчүүдийн 59кг-ын жинд өрсөлдсөн ОУХМ Э.Энхтамир тэмцээнээ дуусгалаа. Манай тамирчин огцом өргөлтөд 92 кг-ыг захиалсан ч гурван өргөлт гурвуулаа амжилтгүй болж, түлхэлттэй өргөлтөд гарч чадсангүй. Мөн өнөөдөр 19:00 цагаас эмэгтэйчүүдийн 64 кг-ын жинд Г.Ануужин өрсөлдсөн ч хоёрдугаар шатаа үргэлжлүүлж чадсангүй тэмцээнээ өндөрлүүллээ. 

2.    Хөнгөн атлетик

09:40 минутаас эхэлсэн 800м-ын гүйлтийн тэмцээн Н.Жанос тэмцээний 3 дахь гараанд уралдан 1:59.11 7-р байр амжилттайгаар 7-р байраар барианд орлоо.

3. Бадминтон

10:00 цагаас хосын төрөлд Б.Хулангоо, Б.Даваасүрэн нар Казакстаны багт 0-2 

12:40 минутаас хосын төрөлд Д.Хэрлэн, М.Золзаяа нар Непалийн багт 0-2

14:00 цагаас эрэгтэйхосын төрөлд Б.Хувьтөгөлдөр, Ж.Гэрэлсүх нар БНХАУ-ын багт 0-2 

14:40 минутаас эрэгтэй хосын төрөлд О.Энхбат, Э.Эрдэнэбаяр нар Пакистан багт 0-2 харьцаатай тус тус ялагдал хүлээлээ. 

4.    Шатар

15:00 Эрэгтэй багийн төрөл дөрөвдүгээр тойргийн тоглолтууд үргэлжилж өнөөдөр Киргизстан улсын багтай таарсан ба гурав ялагдаж нэг тэнцэн 0.5 оноо цуглууллаа. Улмаар манай шатрын Их мастерууд болох Ц.Батчулуун, С.Ган-Эрдэнэ, Г.Мөнхжаргал, С.Билгүүн, Г.Амартүвшин нар нийлбэр дүнгээр 8 оноо цуглуулаад байна.  

15:00 Эмэгтэй багийн төрөл дөрөвдүгээр тойргийн тоглолтууд мөн явагдаж 

Б.Баярмаа, Б.Алтантуяа, А.Энхтуул, Т.Мөнхзул, Б.Мөнгөнтуул нар АНЭУ-ын тамирчидтай өрсөлдөн 3 ялалт, нэг тэнцээтэйгээр 3.5 оноо цуглууллаа улмаар 8.5  манай баг нийтдээ 8.5 оноо цуглуулаад байна. Маргааш 5-р тойргын тоглолтууд 15:00 цагаас эхэлнэ. 

5.    Байт харваа

09:00 Рекурв холимог багийн төрөлд Индонезийн эсрэг 1-5 харьцаатай

09:00 Компоунд холимог багийн төрөлд БНСУ-ын эсрэг 145-155 харьцаатай

10:00 Компоунд эмэгтэй багийн төрөлд Вьетнамын эсрэг 205-228 харьцаатай

10:00 Компоунд эрэгтэй багийн төрөлд Тайваны эсрэг 212-232 харьцаатай

11:00 Рекурв эмэгтэй багийн төрөлд Японы эсрэг 0-6 харьцаатай ялагдал хүлээлсэн бол 11:10 цагаас Рекурв төрөлд эрэгтэйчүүдийн шигшээ баг эзэн орон БНХАУ-ын эсрэг тоглож 5:1 харьцаатай ялалт байгуулан шигшээ наймд шалгарлаа. Манай баг хагас шигшээд шалгарахын төлөө 10-р сарын 06-нд Энэтхэгийн багтай тоглохоор учраа таарчээ. 

Үргэлжлээд  эрэгтэйчүүдийн байт харвааны ганцаарчилсан төрөлд Г.Шандан Саудын Арабын тамирчинд ганцхан оноогоор буюу 140-141 харьцаатай ялагдлаа. Мөн тус төрөлд П.Жамьянгомбо Шри Ланка улсын тамирчинд хоёрхон оноогоор буюу 137-139 харьцаатай ялагдал хүлээлээ. Эмэгтэйчүүдийн ганцаарчилсан төрөлд өрсөлдсөн Б.Батдулам Сингапурын тамирчинд 136-143 харьцаатай, С.Мөнх-Эрдэнэ БНСУ-ын тамирчинд 123-143 харьцаатай тус тус ялагджээ.

Харин 15:25 цагаас Рекурв төрлийн эрэгтэйчүүдийн ганцаарчилсан төрөлд Б.Отгонбол Ливаны тамирчинг 6-0 харьцаатай, Ж. Гантөгс Пакистаны тамирчин 6-2 харьцаатай ялалт эхний тойргын ялалтаа авлаа. 

16:15 цагаас Рекурв төрлийн эмэгтэйчүүдийн ганцаарчилсан төрөлд Ө.Халиун Йорданы тамирчинтай өрсөлдөж 6:4 харьцаатай ялалт байгуулан эхний шатаа давлаа. Маргааш 08:40 цагаас байт харвааны тэмцээнүүд үргэлжлэн явагдана.  

6.    ИСпорт

Азийн наадмын ДОТА2 төрөлд дэлхийн топ түвшний тоглогчидтой эзэн орон БНХАУ-ын багт ялагдсан ч түүхэндээ анх удаа мөнгөн медаль хүртлээ. Анх удаан Азийн наадамд нэмэгдсэн ИСпортын Дота 2 төрөлд манай баг мөнгөн медаль хүртлээ. Манай баг зүгээр ч нэг мөнгөн медаль хүртсэнгүй дэлхийн про түвшний өндөр чансаатай тоглогчидтой БНХАУ-ын багтай 3 мап-ын турш гал гарсан тоглолтыг үзүүлж 2-1 харьцаатай ялагдал хүлээлээ. Ямар гайхалтай, зоригтой, тайван, мэргэжлийн түвшний тоглолт болов оо. Багийн төрөлд хоёр дахь мөнгөн медаль хүртсэн шигшээ багтаа баяр хүргэе.   Өчигдөр хагас шигшээд Киргизстаны багийг 2-0 харьцаатай буулган авч өнөөдөр зохион байгуулагч хүчирхэг БНХАУ-ын багтай аваргын төлөө 19:00 цагаас тоглож тун өрсөлдөөнтэй хүч тэнцүү үзсэний эцэст ялагдал хүлээсэн ч чамлахааргүй том амжилт гаргалаа. Эсрэг баг Дота2 спортын хамгийн том тэмцээн болох The International наадмын 2 удаагийн дэд байрт PSG.LGD багийн тоглогчид асан Ame, Somnus, Chalice, XinQ нар тоглож байсан билээ. 

7.    Волейбол

Манай баг В хэсэгт Хятадын Тайван, Тайландын багуудтай учраа таарсан. Өнөөдөр дэлхийн чансаанд 13-т эрэмбэлэгддэг хүчирхэг Тайландын багтай 14:30 цагаас гурван сэт өрсөлдөн 14-25, 20-25, 12-25 харьцаатай хожигдлоо. Ингэснээр манай эмэгтэй шигшээ баг хэсгийн сүүлийн тоглолтоо хийж хэсэгтээ Тайван, Тайландын багуудад хожигдон 9-12-р байрын төлөө 10-р сарын 7-ны өдөр тоглох юм.  

8.    Триатлон

Спорт дундаа хамгийн тэсвэр тэвчээр шаарддаг Триатлоны тэмцээнд манай улсаас багийн төрөлд оролцож нийлбэр дүнгээр  12-р байр эзэллээ.