Nike брэнд 2016 онд лигийн хувцасны ивээн тэтгэгч болсноосоо хойш долоо дахь удаагаа City Edition буюу 30 багийн хотуудын соёл, уламжлал онцлогтой хослуулан гаргадаг өмсгөлийг үйлдвэрлэж байна.  Бямба гарагаас энэ жил анх удаа зохиогдож байгаа “Улирлын цомын тэмцээн”-ий тоглолтууд эхлэх ба багууд шинээр гаргасан өмсгөлөөрөө гангарч тус тоглолтуудад оролцох ба цаашдаа ч энэхүү өмсгөл нь улирлын онцлох өмсгөл болно. 

NBA-ийн багийн брэнд, бүтээгдэхүүний ахлагч Надиа Рухпарвар "Бид City Edition дээр бүх 30 хотын иргэдийн онцлог, соёлын бүтээн байгуулалт, багийн уламжлал зэргийг загварт нь тусгаж оруулдаг байдлаа үргэлжлүүлсээр байна" хэмээн мэдэгдэв. Доорх өмсгөлүүд нь жилдээ нэг л удаа гардаг учраас тун ховор байдаг. Тиймдээ ч багийн үнэнч хөгжөөн дэмжигчид хязгаартай гарсан өмсгөлүүдийг эртлэн худалдан авч үнэд хүргэн зарах ч тохиолдлууд цөөнгүй байдаг.