Олон улсын хөлбөмбөгийн холбооны ерөнхийлөгч Жанни Инфантино 2034 оны дэлхийн аварга шалгаруулах тэмцээнийг Саудын Арабт зохион байгуулна гэдгийг өөрийн инстаграм хуудаснаа батлан мэдэгдлээ. Ингэснээр 2002 онд Өмнөд Солонгос, Япон, 2022 онд Катар улсууд ДАШТ-ийг зохион байгуулсны дараа Ази тивд гурав дахь удаагаа зохиогдож буй дэлхийн аварга шалгаруулах тэмцээн болно. Ваххабигийн вант улсын цаг уурын нөхцөл байдлаас шалтгаалан тэмцээнийг өвлийн улиралд зохион байгуулах шаардлагатай. Өнгөрсөн жил Катар улс дэлхийн аварга шалгаруулах тэмцээнийг зохион байгуулахдаа сэрүүний улирлыг сонгож байсан билээ.

Олон улсын хөлбөмбөгийн холбоо 10-р сарын 31-ний өдрийг хүртэл 2034 оны хөлбөмбөгийн дэлхийн аварга шалгаруулах тэмцээнийг зохион байгуулах саналаа ирүүлэхээр тогтоосон байсан. 2034 оны тэмцээнийг зохион байгуулах ээлж Ази тивд байсан бөгөөд ийнхүү Саудын Араб Азийн цорын ганц нэр дэвшигч болж, өрсөлдөгчгүйгээр сонгогдож байна. Криштиану Роналду, Карим Бензема, Бразилийн Неймар тэргүүтэй оддын бүрэлдэхүүнийг нутгийнхаа лигт амжилттай нэгтгэж, дэлхийн хөлбөмбөгийн томоохон хүч болох Саудын Араын стратегийн оргил үе болж байна. Лхагва гарагт Австрали улс 2026 оны AFC эмэгтэйчүүдийн Азийн аварга шалгаруулах тэмцээн, 2029 оны хөлбөмбөгийн клубүүдийн дэлхийн аварга шалгаруулах тэмцээнийг зохиох болсон тул 2034 оны дэлхийн аваргын тэмцээнийг зохион байгуулах нэр дэвшигчээс татгалзаж байгаагаа мэдэгдсэн юм. Энэ шийдвэр нь Саудын Арабыг дэлхийн хамгийн чухал тэмцээнийг зохион байгуулах цорын ганц сонголт болгож үлдээжээ.  

"Дэлхийн хамгийн агуу тэмцээнийг Канад, Мексик, АНУ 2026 онд Хойд Америкт зохион байгуулна. Хөлбөмбөгийн дэлхийн аварга шалгаруулах тэмцээний дараагийн хоёр удаагийн тэмцээн Африк (Марокко), Европ (Португали, Испани)-д болно. 2030 онд Өмнөд Америкт (Аргентин, Парагвай, Уругвай)-д зохиогдоно. 2034 онд Азид Саудын Арабт болно. Энэ нь хөлбөмбөгийг үнэхээр дэлхийн хэмжээнд хүргэж байна." гэж Жанни Инфантино өөрийн инстаграм хуудсандаа дурджээ. Ийнхүү ФИФА 2026-2034 онд болох дэлхийн аварга шалгаруулах тэмцээнийг зохион байгуулагчдыг хэдийнэ баталгаажуулаад байна. Энэ талаар Инфантино тайлбарлахдаа, "Тендерийн үйл явцыг бүх зургаан холбоог төлөөлдөг ФИФА-гийн зөвлөлөөр зөвшилцсөний үндсэн дээр бүтээлч, өргөн хүрээтэй яриа хэлэлцээний үр дүнд баталсан. Бид улам хуваагдаж, түрэмгийлсэн ертөнцөд амьдарч байгаа хэдий ч хөлбөмбөг биднийг нэгтгэдэг." гэжээ.