Дэлхийн муай тай холбооны Монгол дахь төлөөлөгч холбоо болох Монголын муай тай боксын холбооны Монгол улсын анхдугаар аварга шалгаруулах тэмцээнийг 1-р сарын 21-ний баасан гарагт UB EVENT HALL-д зохион байгуулах гэж байна. Холбооны хувьд байгуулагдаад 3 жил болж байна. Монгол тулаанчдыг дэлхийн ранк буюу чансаанд оруулж, сонирхогчын төрлөөр хичээллэж байгаа Монгол улсын баг тамирчдыг муай тай төрлийн дэлхийн аварга төрүүлэх зорилгоор үйл ажиллагаагаа эхлүүлэн ажиллаж байна. Тэмцээнд 18 тамирчин жингийн ангилалуудад өрсөлдөнө.
Онцгойлон 71 кг-ийн шилдэг дөрвөн тамирчин Монгол улсын аваргын бүсний төлөө хоёр тулаан хийж өрсөлдөнө. Ялагч аваргын бүс, 10,000,000 төгрөгний эзэн болно. Бусад жингийн тамирчдын хувьд халз тулаан хийх юм. Мөн аваргаа тодорсон тамирчид цаашид олон улсад өрсөлдөх эрх нь нээлттэй болох чухал ач холбогдолтой юм. Өнөөдөр муай тай улсын аварга шалгаруулах тэмцээнд оролцох тамирчид хэвлэлийн хуралд оролцож, тэмцээний өмнөх уулзалтанд оролцсон юм.
Муай тай бокс нь өвдөг, тохой, хөлийн өшиглөлт, гарын цохилт болон клинч хэрэглэн тулалддаг босоо тулааны төрөл. Нэг ёсондоо дөрвөн мөч, өвдөг тохой ашиглан тулалддаг. Муай тайгаар суралцагчыг Nak Muay гэж дууддаг. Мутай урлаг маш олон зуун жилийн өмнөөс үүссэн бөгөөд 16-р зуунд Хаан Наредан цэргүүдээ дайн байлдаанд бэлтгэхэд ашигладаг байжээ.
Хожим нь 19, 20-р зуунд илүү хөгжиж, дэлхий даяар тархжээ. Монгол улсын хувьд муай тай боксоор сонирхож хичээллэгсэд чамгүй олон бөгөөд олон улсад бэлтгэлд хамрагдаж, тулаануудад оролцож дэлхийн чансаанд дээгүүр бичигддэг тамирчид ч байдаг. Монголын муай тай боксын холбоо тамирчдынхаа чансааг ахиулж, цаашид тив, дэлхийд амжилт гаргах замыг нь эрчимжүүлж, аваргын бүсний тулаануудыг ийнхүү зохион байгуулж байна.
Улсын аварга шалгаруулах тэмцээний ерөнхий ивээн тэтгэгчээр “TEZU” ХХК, 5.11 Спорт Брэнд
Зохион байгуулах газар : UB Event Hall
Тэмцээн болох хугацаа : 2022.01.21-ний өдөр 17 цагаас
