Чөлөөт, сонгомол бөхийн 2025 оны Азийн АШТ Йорданы нийслэл Амман хотноо гурав дахь өдрөө үргэлжилж байна.

Тэмцээний эхний хоёр өдөр сонгомол бөхийн медальтнууд тодорсон бол өнөөдөр эмэгтэй чөлөөт бөхийн тэмцээн эхэлж байна. Өнөөдөр Монголын таван бөх барилдахаас 55 кг-д зодоглож буй Б.Отгонтуяа эхний ялалтыг байгуулж, шөвгийн наймд шалгарлсан. Улмаар тэрбээр шөвгийн наймд Казахстаны 35 настай хашир туршлагатай бөх Зульфия Яхароваг 11:0-ээр оноогоор цэвэр ялсан юм. Манай бөх эхний хоёр барилдаанд дараалж цэвэр ялахдаа нэг ч оноо алдалгүй, 21 оноо аваад байна.

Түүний араас Эмэгтэйчүүдийн 59 кг-д Т.Алтжин, 68 кг-д Э.Дэлгэрмаа нар шөвгийн 8-ын учраагаа ялснаар их шөвөгт шалгараад байна. Улсын шинэхэн аварга Т.Алтжингийн хувьд Кыргызстаны бөх, U-20 насны Азийн АШТ-ий мөнгөн медальт Танчолпон Кибалбековаг 8:0-ээр буулгаж авсан. Одоо тэрбээр хагас шигшээд Японы Сакүра Онишитэй барилдах болно.

ДАШТ-ий мөнгө, Азийн наадмын хүрэл медальт, ОУХМ Э.Дэлгэрмаа 68 кг-ын шөвгийн 8-д БНСУ-ын Ким Мин Жу-г цэвэр ялж, мөн хагас шигшээд үлдээд байна. Барилдаанд манай бөх 9:0-ээр тэргүүлж яваад цэвэр дарсан юм.

Одоо манай бөх БНАСАУ-ын бөх, Парисын олимпын 5-р байрын шагналт Пак Сол Гум-тай барилдах болно.

Бөхчүүддээ амжилт хүсье!

Эх сувралж: Монголын Чөлөөт бөхийн холбоо

Гэрэл зургийг Д.Нямбилэг (Монголын спортын сэтгүүлчдийн холбоо)