Испанийн “Ууртай бух” хочит, “Их дуулга”-ын 22 удаагийн аварга домогт теннисчин Рафаэль Надаль 11-р сард сүүлийн тэмцээндээ оролцсоны дараа эх спортоосоо зодог тайлна гэдгээ мэдэгдлээ. Бүх цаг үеийн хамгийн шилдэг теннисчдийн нэг гэгддэг Надалийн сүүлчийн тэмцээн ирэх арван нэгдүгээр сард болох Дэвисийн цомын финал бөгөөд Испанийн шигшээ багийн хамт оролцох юм.

Өдгөө 38 настай Надаль Францын нээлттэй тэмцээнд 14 удаа түрүүлж, 22 удаа Их дуулгад түрүүлж, өөрийн нэрээ дэлхий дахинаа дуурсгасан билээ. Харамсалтай нь сүүлийн жилүүдэд бэртлээс болж олон тэмцээнийг өнжсөн ба зуны олимпын өмнө энэ жил түүний тоглох сүүлчийн жил байх болно гэдгээ мэдэгдсэн юм.

Өчигдөр олон нийтийн сүлжээнд Надаль "Сайн байна уу, би мэргэжлийн тенниснээс зодог тайлж байгаагаа мэдэгдэж байна. Бодит байдал дээр сүүлийн жилүүд надад үнэхээр хэцүү байсан. Ялангуяа сүүлийн хоёр жил. Миний тоглох хугацаа хязгаартай. Энэ шийдвэрийг гаргахад хэцүү байсан нь мэдээжийн хэрэг. Энэ шийдвэрийг гаргахад багагүй хугацаа зарцуулсан. Гэхдээ энэ амьдралд бүх зүйл эхлэл төгсгөлтэй байдаг. Ийнхүү миний төсөөлж байснаас хамаагүй илүү урт, амжилттай байсан замналаа дуусгахад тохиромжтой цаг болсон гэж би бодож байна” хэмээн мэдэгджээ.

Ийнхүү нэгэн цагт Рафаэл Надальгүй “Их дуулга” гэж байхгүй хэмээн яригдаж байсан Олимпын хоёр алтан медальт, Испанийн домогт тенничний талбай дээрх замнал ийнхүү өндөрлөж байна.