Олимпын наадамд оролцохоор сонгогдох нь тамирчдын хувьд хамгийн өндөр амжилт бөгөөд тэдний ихэнх нь олимпын бөгжний (цагариг) шивээсийг хийлгэн олимпод оролцсон цаг мөчөө үүрд дурсахыг хүсдэг. Гэвч энэ нь паралимпод оролцох тамирчдын хувьд хэцүү аж. Учир нь олимпын бөгжний шивээс нь тэднийг олимпоос хасагдахад хүргэж болзошгүй юм.

Олон улсын паралимпын хороо (IPC) нь Олон улсын олимпын хорооноос (ОУОХ) тусдаа байгууллага боловч хоёулаа тамирчдад "биеийн сурталчилгаа" хийхийг хориглосон дүрэмтэй байдаг (сурталчилгааны бусад олон дүрэм байдаг бөгөөд тодорхой хэмжээсүүд байдаг). Жишээ нь тухайн тамирчин Парис-2024 олимпын наадамд олимпын цагаригийн шивээстэй орж байвал ОУОХ-ны дүрмийн дагуу энэ нь зүгээр юм. Учир нь тухайн бөгжний шивээс нь ОУОХ-ны брэндийг "сурталчилж" байдаг. Харин тамирчин хоол тэжээлийн болон бусад ивээн тэтгэгчийн шивээстэй бол тэмцээний үеэр үүнийг далдлах шаардлагатай болдог буюу хориотой гэсэн үг.

Паралимпын тамирчдын хувьд бие дээрээ ямар нэг ил харагдахуйц олимпын цагаригийн шивээстэй байж болохгүй бөгөөд олимпын цагариг нь ОУОХ-ны албан ёсны лого учраас олон улсын паралимпын хорооны дүрмийг зөрчиж буй хэрэг буюу өөр байгууллага, брэндийн "биеийн сурталчилгаа" болж байгаа гэж үздэг. Энэхүү дүрэм нь олон улсын паралимпын хорооны (ІРС) аливаа тэмцээнд хамаарна. Мөн World Para Swimming дүрэмд "Биеийн сурталчилгаа (WPS лого эсвэл Agitos тэмдэгээс бусад) ямар ч байдлаар шивээс нь зөвшөөрөгдөөгүй (үүнд шивээс, тэмдэг орно)" гэж заасан байдаг. Харин паралимп наадмын бэлгэ тэмдэг "Агитос" нь олимпын цагирагтай дүйцэх тэмдэг бөгөөд пара тамирчдад энэ шивээсийг үзүүлэхийг зөвшөөрдөг байна. Энэхүү шивээсний дүрмийг Лондон-2012 наадмын өмнө нэвтрүүлсэн боловч 2016 он хүртэл зохих ёсоор хэрэгжүүлээгүй байна. Харин Парис -2024 паралимпын наадмын өмнө тамирчдад энэ дүрмийн талаар мэдээлэл өгсөн бөгөөд энэ нь 2024 оны Парис хотноо хэрэгжих дүрэм бололтой.