АНУ-ын эрэгтэй шигшээ багийн ерөнхий захирал Грант Хиллын зарласнаар Стефен Көрри, Леброн Жэймс, Кевин Дурант, Жэйсон Тэйтум, Жоел Эмбийд нар багтаж байгаа гэнэ. Харин сэлгээнд Жрү Холидэйг багтаах нь баттай болжээ.

2024 онд Парист болох Олимпод оролцох АНУ-ын сагсан бөмбөгийн шигшээ багийн эрэгтэй багуудын нэрс тодроод эхэлсэн. 

USA Basketball-ын мэдээлснээр Леброн Жэймс, Кевин Дюрант, Стефен Көрри, Жоел Эмбийд, Жэйсон Тэйтум нар гэмтэл бэртэлгүй байж чадвал гарааны тоглогчоор гарах нь баталгаажжээ.

Эдгээр тоглогчдын нэрсийг харахад л олон улсын сагсан бөмбөгийн түүхэн дэх өнөө цагийн хамгийн авьяаслаг, чадварлаг тоглогчдын нэг болсон нь харагдаж байна. Леброн Жэймс, Кевин Дюрант, Стефен Көрри, Жоел Эмбийд нар бүгд NBA-ийн MVP-ийн шагнал хүртэж байсан бол Жэйсон Тэйтум энэ жил тус шагналд хүчтэй яригдаж буй. Мөн Леброн Жэймс, Кевин Дурант, Стефен Көрри зэрэг нийтдээ 9 удаагийн аваргын туршлагатай тоглогчид багтсан байна. 

Эдгээр таван тоглогчоос гадна үндсэн бүрэлдэхүүнд багтах 12 тоглогчийн жагсаалтад Бостон Селтиксийн хамгаалагч Жрү Холидэй багтана хэмээнэ мэдээлжээ. Холидэй АНУ-ын сагсан бөмбөгийн сэлгээний бүрэлдэхүүнийг ахлах чадвартай, туршлагатай тоглогч гэж үзсэн ба өнгөрсөн долоо хоногт USA Basketball-ын удирдлагуудад олимпод оролцоно гэсэн амлалтаа өгсөн байна. Мөн "Финикс Санс"-ын од Дэвин Бүүкерийг бэртэл гэмтлээс холуур байвал АНУ-ын багийн үндсэн бүрэлдэхүүнд оролцуулах төлөвтэй байна. Дээр нь Энтони Эдвардс, Тайрис Халибуртон, Энтони Дэвис, Бам Адебайо нар үндсэн 12 хүний бүрэлдэхүүнд багтах төлөвтэй байна. 

АНУ-ын баг Парист тав дахь дараалсан алтан медалиа авбал, нийлбэр дүнгээр 17 дахь алтан медалиа хүртэх гэж байна. Өмнөх Токиогийн олимпод Грегг Поповичийн удирдлаган дор туслахаар ажиллаж байсан Стив Керр энэ удаа шигшээ багийг удирдана. Керрийн туслахаар Тайрон Лю, Эрик Споэлстра, Гонзага Их сургуулийн ахлах дасгалжуулагч Марк Фью ажиллахаар болжээ.