Б.Бат-Энх буюу Кабалын анхны олон улсын тэмцээн нь 2015 онд Солонгост болсон Азийн аварга шалгаруулах тэмцээн байжээ. “MongolZ” багтайгаа “ASUS ROG MASTER” гэдэг Азийн томоохон тэмцээнд түрүүлж байсан. Үүний дараагаар “Tiger” багийн хамтаар Азийн аварга шалгаруулах тэмцээнд түрүүлсэн. Хамгийн сүүлд саяхан “IHC” багтайгаа хамт Азийн аваргад түрүүлж, “Major”-т оролцсон нь түүний хамгийн том амжилт.

Түүний Кабал хочны тухайд Мортал Комбат тоглоом нь дээр гардаг дүр, характерийн нэр. Гэхдээ тэр тоглоомоос сэдэвлэж аваагүй. Анх түүнийг 8, 9 настай байх үед Францын багт Кабал гэдэг тоглогч байжээ. Тэр тоглогч Бат-Энхэд күүл харагдсан. Жоохон байхдаа гэрийнхээ урд талын интернэт кафед олон ах нартай, найз нартайгаа тоглодог байсан. Нэг өдөр “Kabal” гэдэг нэр өгөөд тоглосон, түүнээс хойш интернэт кафед орохоор хамт тоглодог байсан ах нар нь түүнийг Кабал гэж дууддаг болсон. Тийм ч учраас энэ нэрэн дээрээ тогтох юм байна гэж бодсон гэнэ.

Мэргэжлийн замналдаа тоглосон багуудын хувьд хамгийн анх “MongolZ” багаас эхэлсэн. “BINM”,“5 Power”, “Mazaalai” “August”, “Tiger”, “Renewal”, “Checkmate”, “IHC” багуудад тоглосон. 2017 онд Хятад руу “5 Power” баг руу явсан. Эхлээд Добу “5 Power”-т орж, түүний дараачаар Кабал орсон байна. Тухайн үед Монголын багуудад спонсор байхгүй, цалингүй байдаг байсан учраас гадаадын багт тоглохоор шийдэж байсан. Монголд болгоод үргэлжлүүлж явахад хэцүү нөхцөлтэй байсан бол Азийн бусад улсын багууд мэргэжлийн багууд бий болгож, цалин, хангамжтай байдгийг мэдээд “5 Power”-т орох боломжтой талаар Добугаар дамжуулж багаасаа асуулгаж байсан. Улмаар Хятадын баг түүнийг туршиж үзэхээр шийдэж, сарын дараагаар үндсэн гишүүнээрээ авч байжээ. Одоо тоглож байгаа “IHC” багийн хувьд бүхэлдээ насны хувьд залуу. Хамгийн залуу гишүүн нь 16-тай, 16-21 насны тоглогчидтой. Чадварлаг, мундаг хүүхдүүд гэж “IHC” багийнхнаа боддог.

2017 оны зун Хятадын “5 Power” багт цалинтай мэргэжлийн тоглогч болсон. Цалинтай мэргэжлийн тоглогчийн замнал нь Хятадын багаас эхэлсэн. Түүний мэргэжлийн тоглогчийн анхны цалин 7000 юань байсан. Амжилт нэмэгдвэл цалин нэмэгдэнэ гэсэн гэрээтэй байсан учраас түүнээс хойш цалин нь нэмэгдээд явсан.

Кабалын хамгийн шилдэг хамтрагч бол хамгийн удаан хамт тоглосон хүн болох Ган-Эрдэнэ буюу Добу. Добу, Кабал хоёр өөр, өөр багт тоглож байгаа ч гэсэн дотно найзууд. Бие, биедээ дайсагнаж хүлээж авдаггүй. Хоёулаа л ижилхэн мэргэжлийн тоглогчид учраас Монголын и-спортыг хөгжүүлэх зорилготой явж байгаа. Добутай анх тэрбээр 2011 онд танилцсан. Тухайн үед Кабал 10 жилд 9-р ангид байсан. Тэр үед интернэт кафе /PC/-нд тоглож явж байхдаа Добуг анх харсан. Добу нэлээн том биетэй, бандгар хүүхэд байсан, “egdu” гэдэг нэртэй тоглодог байсан. Анх харж, мэддэг болсон нь 2011 он бол илүү дотно танилцаж, найзууд болсон нь “MongolZ” багт орсноос хойш.

Чөлөөт цаг маш бага гардаг. Чухал, том тэмцээн тулсан үед өдөрт дор хаяж 9 цаг бэлтгэл хийдэг. 9 цагийн турш тасралтгүй тоглодог гэсэн үг биш. Судалгаа хийх, өөрсдийн тактикаа ярилцах, хоолоо идэх, амралтын цаг гэхчлэн бэлтгэлийн туршид олон процесс өрнөдөг. Чөлөөт цаг гарвал аль болох найз охиндоо зориулдаг. Чөлөөт цагаараа, агаарт гарч аль болох хөдөө явахыг хичээдэг. Олон цагийг дотор орчинд бэлтгэл, тэмцээн, тоглолт гэж өнгөрүүлдэг учраас агаарт гарахыг, найз охиндоо цаг гаргахыг илүүд үздэг.

Бат-Энх буюу Кабал нь и-спортоор хичээллээд хамгийн их баярласан мөч бол хамгийн сүүлд Major ангилалын тэмцээнд оролцсон нь. Major-т орох болсон, sticker гарсан гэдгийг сонсоод тухайн үед бараг уйлах дөхөж, нулимс дуслуулсан. Уйлах, баярлах зэрэгцэж, хэлэх үггүй болж байсан.

Түүний CS:GO дээрх хамгийн дуртай skin бол AKA47 Fire Serpent. Мөн butterfly fade, karambit зэрэг skin-үүдэд дуртай.

Superpower-тай байсан бол цаг хугацааг ухрааж, өөрөө тэр үеийнхээ нас, биетэй болдог бол гоё гэж боддог. Цаг хугацаа ухрааж чаддагийнхаа хэрээр тухайн он, жилийнхээ бие махбодтой болдог бол гоё байх юм шиг санагддаг.