Үндэсний дээд лигийн Сэлэнгэ Бодонс багийн эзэн Л.Наранбаатар өнөөдөр өөрийн цахим хуудсаараа дамжуулан Dwight Howard болон хэд хэдэн NBA од тоглогчийг “Selenge Bodons” багт тоглуулах хэлцэл хийж буйгаа зарлалаа.
Өмнө нь Dwight Howard-ыг Монголын Дээд лигт авчирах талаар хэд хэдэн багууд холбоо барьсан бол хамгийн бодитой алхмыг Сэлэнгэ Бодонс баг хийгээд эхэлжээ. Тус багийн эзэн Л.Наранбаатар өөрийн цахим хуудсаараа дамжуулан доорх мэдэгдлийг хэлсэн байна.
"Бодонс Спорт менежмент” (BSM) ХХК нь Dwight Howard болон хэд хэдэн NBA од тоглогчийг “Selenge Bodons” багт тоглуулах хэлцэл хийж буй нь үнэн болно.
Өнөөдөр бид Ховардын агентаас албан ёсны гэрээний төслийн саналаа хүлээн авлаа. Бид ойрын хугацаанд хэлцлүүдээ эцэслэж, сонголтоо хийх болно. Үүний дотор Демаркус Козинс ч мөн бий…
BSM уг хэлцлийг Монголынхоо сагсан бөмбөгийн хөгжлийг нэг шат ахиулахын төлөө хүсэж, эрсдэл гарган тэмүүлэн хийж буй болно" гэжээ.
