Үзэгч бидний хүсэн хүлээдэг "зул сарын баярын тоглолт" эхэлэхэд ердөө 12 хүрэхгүй цагийн хугацаа үлдэж ээ. Тэгвэл тус тэмдэглэлт өдөр албан ёсоор бэртлийн улмаас талбайд гарах боломжгүй болсон эхний супер од бол Финикс Санс багийн довтлогч Девин Бүүкер юм.

Тэрээр өнгөрсөн дөрөв дахь өдөр Индиана Пейсерс багийн эсрэг тоглож байгаад цавьний гэмтэл авч талбайг чөлөөлсөн ба сүүлийн гурван тоглолт өнжөөд байгаа юм. Мөн Финикс Сансаас Грейсон Аллен тархи доргилт, Бол Бол зүүн өвдөгний бэртлийн улмаас тус тус маргаашийн тоглолтод оролцохгүй юм байна. Денвер Наггетсийн талбай дээр өчигдөр зочлон тоглосон ба 117-90 харьцаатай ямар ч өрсөлдөөнгүй хожигдсон байдаг. Харин маргааш илүү том тайз дээр, онцгой өдөр талбай дээрээ Наггетсийг хүлээж авах тоглолтод илүү ач холбогдол өгч хариугаа авах чухал тоглолтыг хийх биз ээ.

Наггетсийн хувьд хоёр дахь лидер Жамал Муррей шагайны бэртлийн улмаас маргаашийн тоглолтод оролцох эсэх нь эргэлзээтэй байгаа ба Финикстэй таарсан өчигдрийн тоглолтод оролцоогүй билээ.

Маргааш тоглох бусад багуудын бэртэл гэмтлийн мэдээллийг дурьдвал:

Лос Анжелес Лейкерс багийн лидер Леброн Жеймс - зүүн хөл, Энтони Девис - зүүн мөр, Д'Анжело Расселл - зүүн гарын эрхий хуруу гэх тоглогчид Уарриорс багийн эсрэг тоглох эсэх нь эргэлзээтэй байна.

Селтиксийн хувьд Жейсон Тейтум - өвчин, Жрү Холидей - баруун мөр, Деррик Уайт - шөрмөсний суналт гэсэн тоглогчид Сиксерсийн эсрэг тоглолтод оролцохгүй байх магадлалтай байна. Тейтумийн өвчний зовиур нь Межикийн эсрэг 108-104 харьцаатай хожигдсон тоглолтод оролцох боломжгүй болгосон билээ. Харин Жоел Эмиидийн тухайд оролцоно гэсэн тун сайн мэдээ байна. Тэрээр энэ улиралд 19 тоглолтыг янз бүрийн шалтгааны улмаас өнжсөн гэдгийг мэдэх биз ээ.

Мавериксийн супер од, лидер Лука Дончич өсгийний гэмтэлтэй байгаа ба өчигдөр болсон Портландын эсргэ тоглолтод эргэн ирсэн билээ. Тэгвэл маргааш болох Тимбервулвс багийн эсргэ тоглолтод буцаад эргэлзээтэй төлөвт орсон байна