Малайзын Засгийн газар ирэх оны төсвөөс 72 сая MYR буюу 15 сая долларийг Парист 2024 оны олимпын анхны алтан медалийг авахын тулд спортын салбарт зориулж байгаа аж. Малайз 17 удаа зуны наадамд оролцож 13 медаль хүртэж байсан ч нэг ч тамирчин алтан медаль хүртэж байгаагүй байна. Малайзын ерөнхий сайд болон Сангийн сайд Датук Сери Анвар Ибрахим "Алт руу хүрэх зам" санаачилгад 20 сая MYR буюу 4.2 сая долларын хөрөнгө оруулалт хийжээ. Малайзын шилдэг тамирчдыг дээд зэргээр медаль авахад нь дэмжлэг үзүүлэх зорилготой уг санаачлагыг гуравдугаар сард эхлүүлсэн байна. Одоогоор 18 тамирчинтай баг хоккейн шигшээ багуудтай зэрэгцэн Алтын төлөөх замд багтаж бэлтгэл сургуулилтаа хийж байгаа гэнэ. Анвар Ибрахим Малайзын 2024 оны төсвийг танилцуулах үеэрээ "Ханжоугийн Азийн наадамд 32 медаль хүртэж эх орондоо алдар нэрийг авчирсан үндэсний баатрууд, баатруудынхаа амжилтыг бид тэмдэглэж байна" гэж мэдээлжээ. "Спорт бол Малайзчуудын эв нэгдлийг бий болгох гол платформ юм. Бидний үндэс угсаа, шашин шүтлэгээрээ ялгаатай ч бидний олон талт байдал нь спортын урам зоригийг ямар ч байдлаар бууруулдаггүй." гэжээ.
Мөн түүнчлэн, Үндэсний спортын зөвлөлд 2.5 сая доллар хөрөнгө оруулалт хийхээр төлөвлөсөн байна. Санхүүжилт нь Парис 2024 тэмцээнд оролцох тамирчдын бэлтгэл сургуулилтын хөтөлбөр, пара тамирчдыг дэмжихэд зориулагдана. Анвар Ибрахим 10.5 сая доллар улс орон даяар спортын байгууламжуудыг засварлах, шинэчлэхэд зориулж байна гэж мөн мэдэгдэж байна. Спортын байгууллагуудын нэр хүндтэй спортын арга хэмжээг зохион байгуулахад дэмжлэг үзүүлэх зорилгоор Засгийн газраас 50 сая мянган долларын буцалтгүй тусламжийг үргэлжлүүлэн олгох болно гэж тэрбээр нэмж хэлэв.
"Засгийн газар ард түмэнд зориулсан спорт, амралт зугаалгын хөтөлбөр, тэр дундаа хүүхэд, хөгжлийн бэрхшээлтэй иргэд, амьдралын боломж тааруу гэр бүлийн өндөр настнуудад зориулсан усан сэлэлтийн хөтөлбөрийг үргэлжлүүлэн хэрэгжүүлнэ. Мөн ахмад настнуудын хөдөлгөөн, эрүүл мэндийг дэмжих спорт, амралт зугаалгын зохион байгуулалтыг нэмэгдүүлнэ” гэв.
Малайз 1956 оны Мельбурн хотноо анх удаа олимпод оролцсоноос хойш найман мөнгө, таван хүрэл медаль хүртжээ. Малайзын 13 медалийн есийг нь бадминтоны төрөлд авсан нь бадминтоны тамирчдыг алт авах хамгийн сайн боломжтой гэж үзэж байна.
