1994 онд тэр үеийн Говьсүмбэр аймгийн Сүмбэр сум, одоогийнхоор Чойр хотод төрсөн. Ам бүл дөрвүүлээ. Эгч, ээж, аавын хамт амьдардаг. Манай гэр бүлд спортын удам байхгүй. Аавын аав бүжигчин хүн байсан, өвөөгийн бүжиглэх авьяасыг өвлөсөн гэж боддог. Багадаа их томоотой хүүхэд байлаа. Миний хувьд өвөө, эмээ дээрээ өссөн. Өвөө, эмээ дээрээ өссөн хүүхдүүдийн адилаар зарчимч, юмандаа хямгатай, томоотой, өөрийгөө аваад явах чадвартай тийм хүүхэд байсан. Эмээ, өвөө хоёр маань Говьсүмбэр аймгийн шүүхийн шийдвэр гүйцэтгэх хорих ангид ажилладаг байсан. Чойрын хорих ангид бага насаа өнгөрөөсөн дөө.
Бүжгээр маш багаасаа хичээллэж эхэлсэн. 2000 оноос хичээллэж эхэлсэн. Цэцэрлэгт байхдаа 5 настайгаасаа эхлээд бүжгийн тэмцээн, уралдаанд оролцсон. Чойр хотын Боржигон чуулганы бүжгийн багш миний хамгийн анхны бүжгийн багш байсан. Тэр үед болдог байсан “Одод болохын хүслэн”, “Яргуй” гээд улсын уралдаануудад оролцдог, бүжигт дуртай хүүхэд байлаа. 2001 оноос Улаанбаатар хот руу манайх гэр бүлээрээ нүүж ирээд, Монголын хүүхдийн ордонд 6 жил суралцсан. Сургуулийнхаа бүжгийн дугуйланд бас хүүхдийн ордны бүжгийн дугуйланд давхар явж, уралдаан тэмцээнд их оролцдог байсан. 2006 онд Оюунбат багш, Саранхүү багш хоёр манай сургууль дээр ирээд манай дээд үеийн ах, эгч нарт бүжиг зааж байсан. Багш нарынхаа бүжиг зааж байгааг хараад бүжгийн спорт чача, самба гэх мэт бүжгүүдийг ямар байдаг гэдгийг нь харж байсан. Тухайн үед би Монгол бүжиг л бүжиглэдэг байсан. Удалгүй Сараа багш, Оюунбат багш нарын найз нь манай сургуульд бүжгийн спортын клуб нээхэд элсэж суралцах болсон. Манай сургуулийн бүжгийн клуб дараа нь хаагдсан учир би Сараа багш, Оюунбат багш нартайгаа холбогдож “Moon dance” клуб анх нээгдэж, шинэ зааланд орж байсан 2009 оноос анхны гишүүдийн нэг болж, өнөөдрийн болтол тасралтгүй Moon dance клубийнхээ бүжигчнээр хичээллэж, тэмцээн уралдаанд оролцож байна. Бүжигчин хүн тууштай, шаргуу байвал юманд хүрдэг гэдэг. Тийм дээ ч бүжгийн спортын үнэнч, тууштай байдлыг шаарддаг энэ байдал миний зан чанарт тохирдог учраас бүжгийн спортод маш их дурлах болсон гэж боддог. Дуртай зүйлээ хийгээд яг энэ сурч байгаа зүйлээ бусдад түгээн дэлгэрүүлж, энүүгээрээ ажиллаж, амьдарч байгаа минь надад нандин санагддаг даа.
Дэлхийн аварга шалгаруулах тэмцээнд Герман улсад 2012 онд болоход онд Стар хамтлагийн бүрэлдэхүүний хамтаар замена гишүүнээр явж байсан. 2013, 2014 Мүүндэнс хамтлагаараа 8 дахь удаагаа, Стар хамтлагийг оролцуулаад 9 удаа дэлхийн аварга шалгаруулах тэмцээнд оролцсон. 2016 онд дэлхийн аварга шалгаруулах тэмцээнд явахдаа жирэмсэн байсан. Жирэмсэн байгаагаа мэдэхгүй явж ирээд дараа жилийн дэлхийн аваргын тэмцээнээ яана аа гэж бодож байсан. 2017 оны дэлхийн аварга зохиогдохоос гурван сарын өмнө төрсөн. Төрсний дараа 1 сарын хугацаанд гам бариад, тэгээд шууд бэлтгэлдээ орж байсан. Хамгийн сонин хугацаа тэр үе байдаг. Хүүгээ гуравхан сартай байхад нь үлдээгээд тэмцээнд явж байсан. Аливаа зүйлд золиос гаргах хэрэгтэй үе гэж байдаг. Бүжгийн спортоор хичээллээд хоёр удаа том золиос гаргасан гэж боддог. Эхнийх нь хүүгээ нярай байхад нь үлдээгээд дэлхийн аваргад явсан үе. Хоёр дахь 2018 онд Англи руу хамтлагаараа тэмцээнд явсан үе. Тэр үед хүү маань 9 сартай байсан. Тэмцээнд яваад ирэхэд хүү маань маш том түлэгдэлтэд орчихсон, үхэхээс наагуур болсон байсан. Бүжгийн спортдоо цаг зав, сэтгэлээ зориулсан энэ хугацаанд том золиос гаргасан тэр мэдрэмжүүд тухайн үед хүнд санагдсан. Дэлхийн аваргаас медаль авна гэдэг нь Монгол бүжигчдийн мөрөөдөл байсан. Мөнгөн медаль битгий хэл хүрэл медаль ч хол мэт санагдаж, медалийн тавцанд зогсохыг мөрөөддөг байсан. Түрүү жилийн мөнгөн медаль бидэнд маш их урам зоригийг өгч, мөрөөдөл биелсэн. Хамтаараа хичээж чадвал, төлөвлөж хэрэгжүүлж болох юм байна гэдгийг харсан. Бид тэмцээнд явахдаа өөрсдөөсөө зардлаа гаргадаг, улсаас юу ч байдаггүй. Маш олон жилийн золиос, нулимс, хичээл зүтгэл, олон сая төгрөгийн зардал гээд олон зүйлийн дараа дэлхийн медалийг бид хүртсэн. 2022 оны 10-р сарын 15 бол үнэхээр гайхалтай өдөр байсан.
Олны танил хүмүүсээс крашладаг хүн Цэрэнболд ах. Би өөрийгөө хүний дуу хоолойнд татагддаг гэж боддог. Дуу оруулдаг, гоё хоолойтой хүмүүс гоё санагддаг. Хэдийгээр Цэрэнболд ахын хүн нь ямар хүн гэдгийг мэдэхгүй ч киноны дуу хоолойг нь сонсохоор крашладаг. Өсвөр насандаа бол Desant. Оюутан байхдаа, 10 жилээ төгсөөд Desant-ийн дууг сонсож крашладаг байсан. Байгаа байдал дууны хэв, маяг зэрэг нь таалагддаг байсан. Одоо бол крашлахаа больсон.
Амьтдаас нохойнд маш их хайртай. Бага байхдаа 2, 3 нохой тэжээж байсан. Тэжээж байгаа амьтнаа их хайрладаг. Одоогоор амьтан тэжээгээгүй байгаа. Ихэнх хүмүүс мэдэхгүй байх, би бүр багаасаа л малын эмч болно гэж боддог байсан. Өвөө, эмээ хоёр маань малтай. Өвөө, эмээ дээр зуны амралтаар очоод байхад өвөө, эмээгийн малыг үзэхээр малын эмч ирдэг байсан нь тод санагддаг. Хээлтэй малыг үзэж байгаа нь гээд малын эмчийн хийж байгаа зүйл нь таалагддаг байсан. Би ерөөсөө л малын эмч болно гэж бодоод ЭЕШ-ийн шалгалтандаа хими, биологийн хичээл бэлдсэн. Одоо ч гэсэн тэр мөрөөдөл минь больдоггүй. Тэр мөрөөдөл минь сэтгэлийн угаас салдаггүй. Малын эмч болохгүй бол мал эмнэлэгтэй болох ч юм уу тэр мөрөөдлөө биелүүлнэ гэж боддог.
Эрэгтэй хүнийг биеэ зөв авч явдаг. Өөртөө арчаатай, цэвэрхэн, цэмцгэр байдал нь таалагддаг. Эр хүн царайлаг байхаас илүү дулаахан инээдэг байвал, загвар хөөхөөс илүү цэвэрхэн хувцасладаг байвал, худал хэлэхээс илүү хүн чанартай байвал, хааяа муухай аашилдаг ч сайхан сэтгэлтэй байвал, эмэгтэй хүнийг хүндэлдэг байвал ямар ч эмэгтэй хүн гарцаагүй дурлах байхаа. Өндөр, нам байх нь тийм чухал биш ч би өөрөө урлагийн хүн болохоор эрэгтэй хүн дуулж чаддаг, төрөл бүрийн авьяастай байвал гоё санагддаг. Бүх юмны дүйтэй, авьяастай байгаасай гэж хүсдэг. Бүр сайн биш ч спортын хэдэн юм чаддаг, бөмбөгтэй харьцаж тоглож чаддаг шинж чанаруудтай эрэгтэйчүүд байвал дээр санагддаг. Өдөр хоногийг аргацааж биш, зорилготой байж, гэр бүлээ аваад явах чадвартай байгаасай гэж эрчүүдийг боддог. Эрэгтэй хүний дотор орж үзэх боломж гарах байсан бол тухайн эрэгтэй нь зодолдож чаддаг байх юм бол муухайгаар биш гоё зодолдож үзэхийг хүсэх байсан байх. Эрэгтэй хүн бас аливаа зүйл болоход нээх уйлдаггүй, яагаад уйлахгүй чадаад байдаг юм бол гэдгийг дотор нь ороод мэдэхийг хүснэ.
Бага наснаасаа олон тэмцээн уралдаанд орсон. Монгол бүжиг, рэп бүжиг гэх мэт олон бүжгийн медальтай. Монгол хүүхдийн ордны медалиуд гэх мэт. “Moon dance” хамтлагтаа орсноос хойш гэвэл бүжгийн спортын формейшн төрлийн 7 удаагийн аварга хамтлаг. Дэлхийн аварга шалгаруулах тэмцээний 9, 8, 7, 5-р байрт шалгарч, хамгийн сүүлд мөнгөн медаль хүртсэн. Би гэлтгүй манай хамтлагийн бүх л залуучууд нийслэлийн шилдэг залуу, сүүлд хамтлагаараа Алтан гадас одонт хамтлаг болсон.
Эргэн тойрны хүмүүсээс нэг хүний бодлыг бодох боломж гарах байсан болохоор шууд ээж л бодогдож байна. Ээжүүд яг шатар тоглоход дараагийн үйлдлүүдийг мэддэг шиг ярилцахад дараа, дараагийн зүйлсийг мэдсэн байдаг. Яг тэр ухаан гаргадаг байдлыг нь яаж вэ гэдгийг мэдмээр байна. Тэрийг мэдчихвэл өөрөө ч гэсэн хатан ухаантай болчих юм шиг санагдаж байна.
Чөлөөт цаг гэхээр одоо арай л завгүй байгаа. Ээжийн талынхан гар урлал талдаа сайн, мундаг хүмүүс байсан юм байна лээ. Тэр удмаа дагаад ч юм уу гар урлал сонирхдог. Маш их зурдаг байсан, одоо гэхдээ зурахгүй байгаа. Хийдэг байсан юмаа хийхгүй байхаар чадахаа больчихдог юм байна лээ. Их юм нэхдэг байсан. Жоохон байхдаа ороолт, малгайгаа нэхээд өмсчихдөг байсан. Сүүлийн үед үс засах дуртай, хоббитой байгаа. Ажлын онцлогоос болоод бүжгийн тэмцээн, бүжиглэх үед үс засах хэрэгцээ их байдаг учраас үс засалтыг хувиараа интернэтээс харж суралцаж байна.
Маш олон төрлийн дуу сонсдог. Тухайн үе, нөхцөл байдлаас шалтгаалж дуу сонсдог. Харин том тэмцээний өмнө гэвэл өөртэйгөө их ярилцдаг. Эргэлт хийх ёстой байвал өөртэйгөө ярилцаж, тайван байж байгаад яваарай. Сүүлийн боломж, ганц боломж шүү гэж бодоод эргээрэй гэх мэтээр өөрөө, өөртэйгөө ярилцаж, дотроо их тунгаан боддог. Бүжиглэж байхдаа өөртэйгөө их ярьж чаддаг. Сэтгэл санаагаа тогтвортой байлгаж чаддаг гэж боддог.
