2022 онд дэлхийн дэвжээнээс медаль хүртэж байсан жүдо бөхийн тамирчид болох Ё.Басхүү, Л.Энхрийлэн нар энэ онд ч мөн гялалзсан амжилтыг үзүүлсэн. 2023 оны 5-р сард Катар улсадболсон ДАШТ-ээс хүрэл медаль хүртэж, медалийн буухиаг үргэлжлүүлсэн. Бөмбөрцөгт үзүүлсэн амжилтыг нь үнэлж жүдо бөхийн тамирчин Ёндонпэрэнлэйн Басхүү, Лхагватогоогийн Энхрийлэн нарыг Монгол улсын гавьяат тамирчин цол тэмдэгээр шагнахаар болжээ. 

Ё.Басхүү нь Завхан аймгийн Нөмрөг суманд төрсөн. Морь, малд л дуртай хүүхэд байсан. Морь, малтай ноцолдож өссөн бөгөөд Нөмрөг суман дахь анхны багш нь Батцэрэн гэдэг хүн байдаг байна. Жүдо бөхөөр 18 настайдаа эхэлж хичээллэсэн. Жүдогоор 8-9 жил хичээллээд дэлхийн аваргаас медаль хүртсэн. Хүний хүссэн дуртай зүйлд хэзээ ч нас оройтохгүй гэж хэлсэн байдаг.  Ё.Басхүү нь 2023 онд ДАШТ-ээс хүрэл медаль, Улаанбаатар их дуулга тэмцээнээс алт, Ханжоу-2022 Азийн наадмаас мөнгө, Токио их дуулга тэмцээнд мөнгөн медаль хүртсэн билээ. 

Л.Энхрийлэн нь 1998 онд Сэлэнгэ аймгийн Мандал суманд төрсөн. Эмээтэйгээ амьдардаг тэрбээр жүдо бөхийн спортоор 2011 хойш хичээллэж эхэлсэн. Багаасаа хөдөлгөөнтэй, цовоо сэргэлэн хүүхэд байсан бөгөөд Спортын төв ордонд анх Шийрэв багшийн шавь болж жүдогоор хичээллэж эхэлсэн. Л.Энхрийлэн нь 2022 оны ДАШТ-ий хүрэл медаль, 2018 оны залуучуудын ДАШТ-ий мөнгөн медаль, Парис, Дюссельдорф, Абу Даби их дуулга тэмцээнүүдийн хүрэл медалиудыг хүртсэн. Мөн Ази тивийн аварга шалгаруулах тэмцээнээс хүрэл медаль хүртэж байсан. 2022 оны Улаанбаатар гранд слам тэмцээний алтан медаль, 2016 оны Чингис Хаан гранпри тэмцээний алтан медальтай. 2023 оны 5-р сард болсон дэлхийн аварга шалгаруулах тэмцээний хүрэл медалийг хүртжээ.