Сонирхогчдын боксын дэлхийн аваргын хүрэл медальт, Азийн наадмын аварга, Ази тивийн хошой аварга, Монгол Улсын гавьяат тамирчин Э.Цэндбаатар мэргэжлийн боксын рингэнд 8 тулаан хийж, 8 ялсан амжилттай байгаа билээ. Түүний ээлжит тулаан тун удахгүй болох гэж байна. 2-р сарын 28-нд Гвиней улсад төрсөн Канад иргэншилтэй тулаанч Мохамед Сумаоротой тулалдахаар болжээ. 

Мохамедын хувьд 1992 онд төрсөн өдгөө 31 настай, 170 см өндөртэй. "The Black Buffalo" хочтой. Мэргэжлийн боксын замналдаа 16 тулаан хийж, 14 ялж, 2 ялагдсан. Үүнээс 6-д нь өрсөлдөгчөө нокаутаар ялж байжээ. 

Харин манай тамирчин Э.Цэндбаатарын хувьд мэргэжлийн боксын замналдаа 8 ялсан амжилттай. Хамгийн сүүлийн тулаанаа өнгөрсөн 12-р сард хийж ялсан. Э.Цэндбаатар сүүлийн тулааныхаа дараа “Ямар ч ко авч үзээгүй, нэг ч удаа нокаутад орж үзээгүй тамирчныг найман үе тулалдаж бүгдэд нь яллаа. Миний рекорд 8:0 боллоо. Өнөөдөр миний өдөр байлаа, оргил тулааныг би хийж чадсан” хэмээсэн байна. 

Мөн өмнө нь тэрбээр "АНУ-д мөрөөдлөө биелүүлэхээр ирсэн. Мөрөөдлөө биелүүлэхийн төлөө тасралтгүй урагшлах болно. Дараах бүх өрсөлдөгчдөдөө амжилт хүсье. Би улам бүр сайжирна. Өдөр ирэх тусам намайг дэмждэг хүний итгэлийг алдахгүй, бөгжний очир эрдэнээс ч илүү гэрэлтэх болно." гэж байсан юм.