Францын хөгжөөн дэмжигчид болох Габриэль Мартин, Мехди Баламисса нар Парисаас Доха хүртэл 7,000 км-ийн "амьдралын өөрчлөлт" нэртэй дугуйн аялал хийж, ДАШТ-д оролцохоор Катарт хүрэлцэн ирлээ.Тэд Францаас Катарт ирэхийн тулд гурван сар зарцуулсан байна. Тэд хэлэхдээ “Францыг гурав дахь удаагаа дэлхийн аварга болно гэж найдаж байгаа. Лусаил цэнгэлдэхийн гадаа байх нь үнэхээр гайхалтай байна. Энэ бол биднийг Истанбул, Петра, Иерусалим зэрэг гайхалтай газруудад хүргэсэн амьдралыг өөрчилсөн аялал байлаа. Их амаргүй аялал байсан. Бид унадаг дугуйтай холбоотой олон механик асуудалтай тулгарч, бэртэл гэмтэл, ядаргаатай тулгарсан ч эдгээр бэрхшээлүүд нь аялалаа дуусгахыг илүү онцгой болгосон." гэжээ.
Францын хоёр фанатын тухайд өнгөрсөн жил УЕФА-гийн Үндэстний лигийн тэмцээнд оролцохоор Францаас Итали руу аялж байсан төдийгүй үүнийхээ дараа Доха руу явах санааг бодож олжээ. Туршлагадаа урам зориг авсан залуус Ойрхи Дорнод болон Арабын ертөнцөд анх удаа хөлбөмбөгийн дэлхийн аварга шалгаруулах тэмцээнд оролцохоор Катар руу явах зорилго тавьсан байна. Баримтат киноны найруулагч Баламисса хэлэхдээ: "Бид хөлбөмбөгт дуртай, бас дугуй унах дуртай. Маш хол замыг туулж, хүрээлэн буй орчин, эргэн тойрноо мэдрэх цаг завыг зарцуулж чаддаг учраас дугуй бол аялах гайхалтай арга зам юм. Урт аялал байсан ч бид гаргасан хүч чадлынхаа ачаар насан туршдаа үлдэх дурсамжийг бий болгосон." гэв.
Туркийн уулс дээгүүр давхиж, Арабын цөлийг даван туулах нь онцгой дурсамжтай байсан гэж Баламисса нэмж хэлжээ. "Бид элсэн цөлд дөрвөн долоо хоног дөрөө эргүүлсэн бөгөөд үнэхээр гайхалтай байсан. Аяллын тухай ярихад үнэхээр итгэмээргүй сонсогдож байж болох ч биднийг угтан авч, зочломтгой байдлаар хүлээж авсан хүн бүр бидний аялалыг үнэ цэнэтэй болгосон. Үнэхээр сэтгэл хөдөлгөм байсан. Хэдийгээр бид Доха хот болон дэлхийн аварга шалгаруулах тэмцээнийг эцсийн зогсоол гэдгийг мэдэж байсан ч хилээр гарах хүртлээ сэтгэл догдлохоос татгалзаж, зорилгодоо хүрэх хүртлээ сонор сэрэмжээ алдаагүй." гэсэн юм.
Мартин, Баламисса нар дэлхийн аварга шалгаруулах тэмцээнд оролцохоор Катар руу аялах хамгийн сүүлийн үеийн зоригтой адал явдалт дэмжигчид болж байна. Тэднээс гадна өмнө нь Саудын Арабын адал явдалт сонирхогч Абдулла Аль Салми Жиддагаас Доха хүртэл 55 хоногийн дотор 1600 км замыг туулсан бол Аргентины дөрвөл болох Лукас Ледезма, Леандро Пиги, Сильвио Гатти, Матиас Верчеси нар Өмнөд Африкаас Катар руу дугуйгаар аялж, 177 хоногийн дотор 10,000 км замыг туулсан билээ. Энэхүү гайхалтай аялалын төгсгөлд Габриэль, Мехди хоёр Францын ахлах дасгалжуулагч Дидье Дешам болон түүний ажилтнуудтай уулзах боломжтой болжээ. Дэлхийн аварга Францын шигшээ баг нутгийнхаа хоёр баатарт баяр хүргэж, хоёуланд нь гарын үсэгтэй өмсгөлийг бэлэглэсэн байна.
Н.Бэлгүүн
