“Парис-2024” зуны 17 дугаар паралимпын наадам өнөөдөр хөшгөө нээсэн. Тус наадамд дэлхийн 168 орны 4400 гаруй тамирчин спортын 22 төрөлд 549 багц медалийн төлөө өрсөлдөнө. Харин манай улсаас зургаан спортын төрөлд 12 тамирчин оролцож байгаа билээ.

Өнөөдөр Монголын Пара тамирчдын салхийг хагалж усан спортын S6 ангилал буюу эмэгтэйчүүдийн 50м-ийн чөлөөт сэлэлтийн төрөлд Монголын Үндэсний шигшээ баг, We Aquastic клубийн тамирчин Хүрэлийн Номуун 16:40 цагаас хоёр дахь гараанд гарч уралдана.

Таеквондогийн төрлөөр манай тамирчдын буухиа үргэлжлэх ба эмэгтэйчүүдийн 52 кг-ын жинд Н.Эрдэнэбаатар, Д.Батнасан дасгалжуулагчтай ОУХМ Уламбаярын Сүрэнжав манай цагаар 19:05 цагаас өрсөлдөнө.

Харин манай улсаас хоёр тамирчны өрсөлдөөн зэрэг эхлэх буюу Байт харвааны ганцаарчилсан төрөлд өрсөлдөж буй Д.Сэлэнгээ, Б.Оюун-Эрдэнэ нар 23:00 цагаас тив дэлхийн 20 тамирчидтай цэц мэргэнээ сорих гэж байна.

Та ба бүхэн Паралимпын наадамд оролцож буй Монгол тамирчдын хуваарь, оноолт, үр дүн, мэдээ мэдээллийг msports.mn-ий ТЭМЦЭЭН хэсгээс болон Msports app-аар дамжуулaн цаг алдалгүй авах боломжтой. Msports App татахыг хүсвэл ЭНД дарна уу.