Парис-2024 паралимпын наадмын нээлтийн ёслол 8 сарын 28 - 29 шилжих шөнө 02:00 цагт нээлтээ хийнэ. Тус наадам Байт харваагаар эхлэх бөгөөд урьдчилсан шатны чансаа олгох шалгаруулалтаар эхэлнэ.

1960 онд Ромд болсон анхдугаар паралимпын наадмаас хойш пара байт харваа нь паралимпын спортын хөтөлбөрт багтаж ирсэн. Гэсэн ч уг спортын түүх нь бүр эртнээс эхлэлтэй. Паралимпын наадмыг үүсгэн байгуулагч гэгддэг доктор Людвиг Гуттман анх 1940 онд Их Британийн Сток Мандевилл эмнэлэгт шархадсан ахмад дайчдыг нөхөн сэргээж эмчлэхийн тулд Байт харвааг ашиглажээ. Тэрээр 1948 онд Их Британийн Дэлхийн 2-р дайны ахмад дайчдын багахан хэмжээний цугларалт зохиож спортын байт харвааны нөхөрсөг тоглолт хийж уг спортын эхлэлийг тавьсан байна.

Нөхөрсөг тоглолтоос цар хүрээгээ тэлэн паралимпын наадмын спортын нэг төрөл болсноор тус төрлөөр хичээллэх хүмүүс ч ихсэж тамирчдын оролцоо ч өссөн байна. 1960 онд Ромд болсон анхны паралимпод байт харваа төрлөөр найман орны 19 тамирчин өрсөлдөж байсан бол "Токио 2020" паралимпод 42 орны 139 тамирчин оролцсон нь эл төрөл улам өргөжиж буйн илрэл юм.

Пара байт харваа

Тамирчид 50 эсвэл 70 метрийн зайнаас сум харваж, байны голд аль болох ойртуулахыг зорьдог. Уг спорт нь өндөр нарийвчлал, хяналт, анхаарал төвлөрөл, давталт шаарддаг. Паралимпын наадамд харваачид биеийн гэмтлээсээ хамааран нээлттэй болон W1 ангилалд хуваагдан рекурв, компаунд  гэсэн хоёр төрлөөр өрсөлддөг. Рекурв нум сум нь уламжлалт нумуудын орчин үеийн хувьсал гэж хэлж болох ба 122 см-ийн байг 70 метрийн зайд харвадаг. Харин Компаунд нум сум нь механик дамар, дуран харагдац, тайлах туслах илүү нарийвчилсан хэрэгслүүдтэй, 50 метрийн зайд 80 см-ийн байг харвадаг. Нэмж дурдахад W1 ангиллын бай нь 80см хэмжээтэй бөгөөд 50 м-ээс бууддаг.

Монгол улсаас байт харвааны нээлттэй ангилалд Рекувр төрөлд Буянжаргал овогтой Оюун-Эрдэнэ, Дэмбэрэл овогтой Сэлэнгэ нар цэц мэргэнээ сорино. Тамирчдын хуваарь, оноо үзүүлэлтийг тэмцээн цэснээс харах боломжтой.