Гэрээ нь 2024 оны зун дуусах өндөр зэрэглэлийн тоглогчдын жагсаалт өмнөх жилийнх шиг тийм ч онцгой биш байгаа ч ирээдүй нь шийдэгдээгүй байгаа томоохон одууд чөлөөт агентын зах зээлд байсаар байна. Килиан Мбаппе Реал Мадрид руу шилжиж болзошгүй тухай яриа үргэлжилсээр байгаа ч эх сурвалжууд түүнийг шинэ гэрээ байгуулах талаар ярилцах шатандаа яваа хэмээн ESPN-д мэдээлсэн байна. Лука Модрич, Тони Кроос зэрэг ахимаг насны тоглогчид гэрээ нь дуусах жилдээ явж байгаа ч ойрын хугацаанд шийдвэр нь гарахгүй бол үнэ цэнээ алдах магадлалтай болоод байна.

Та бүхэнд энэ жилийн шилдэг агентууд хэн байх боломжтойг хүргэж байна. 

Килиан Мбаппе /24 настай/ Парис Сайнт-Жермайн

Өнөө цагийн шилдэг тоглогчдын нэг Мбаппе 2022 онд гурван жилийн шинэ гэрээ байгуулж, Реал Мадрид руу ямар ч төлбөргүйгээр явах нь цуцлагдсан боловч үүнийг биелүүлэхийн тулд гурван жилийн гэрээ биш хоёр жилийн гэрээ хийх боломжтой болсон нь сүүлд тодорхой болсон. Тэрээр одоогийн клубын ерөнхийлөгч Нассер Аль-Хелайфидад явахыг хүсч буйгаа илэрхийлсэн бөгөөд энэ жил багаа орхих нь баттай болсон бил ээ. ПСЖ клуб ямар ч саналд нээлттэй хандана гэсэн ба өнгөрсөн жил Саудын Арабын Про лигийн Аль Хилал клуб 300 сая еврогийн санал тавьж, дэлхийн дээд амжилт тогтоосон ч Мбаппе татгалзсан юм. Иймд түүний одоо очих хамгийн боломжтой баг нь Реал Мадрид хэвээр үлдсэн бөгөөд ирэх зургаан сарын дотор Мадридын өмсгөлтэй талбайд харж магадгүй л юм. 

Адриен Рабиот /28 настай/ Ювентус

Түүнийг Ман Юнайтед эсвэл Барселона руу явах боломжтой гэж олон сар таамаглаж байсны эцэст Рабиот өнгөрөгч зургаадугаар сард Ювентустэй гэрээгээ нэг жилээр сунгасан нь түүний ирээдүйн томоохон шийдвэр нэг жилээр хойшилсон юм. Францын шигшээ багийн тоглогч энэ улиралд 16 тоглолтод оролцож 3 гоол, 3 оновчтой дамжуулалт өгсөн Турины гол тоглогч бөгөөд шүтэн бишрэгчид нь түүнийг удаан хугацаагаар Ювентуст харахыг хүсэж буй. 

Лука Модрич /37 настай/ Реал Мадрид 

37 настай ч гол тоглогчдын нэг хэвээр байгаа Модрич 2012 онд Мадридад ирж, Бернабеуд 11 жил тоглохдоо 23 цом хүртсэн. Хорватын шигшээ багийн тоглогч лигт 15 тоглолт хийснээс долоог нь сэлгээнээс тоглосон бөгөөд тоглох минутдаа сэтгэл хангалуун бус байгаагаа өмнө нь мэдээлсэн. Иймд тэрбээр үлдсэн замналаа өөр газар үргэлжлүүлэхийг үгүйсгэхгүй. 

Валентин Барко /19 настай/ Бока Жуниорс

Дэлхийн шилдэг залуу зүүн жигүүрийн хамгаалагчдын нэг Баркогийн гэрээ 2024 оны арванхоёрдугаар сард дуусах бөгөөд түүнийг Брайтон, Манчестер Сити, Челси, Ливерпүүл зэрэг багууд түүнийг аль хэдийн сонирхож эхэлсэн. Аргентины 23 хүртэлх насны шигшээ багийн тоглогчийн гэрээнд 20 сая ам.долларыг чөлөөлөх заалт байгаа бөгөөд энэ нь гэрээ дуусахаас өмнө өөр багтай гарын үсэг зурж болно. Иймд энэ ондоо тэрбээр дараачийн багаа сонгох бүрэн боломжтой. 

Пиотр Зиелински /29 настай/ Наполи

Зиелински 2016 онд Наполи клубт ирснээсээ хойш Сери А-ийн гол тоглогч байсан ба дараагийн гэрээ хийсэн баг нь сүүлчийн зогсоол байх магадлалтай тул цалингаа нэмэхийг хүсч байгаа гэдгээ мэдэгдсэн. Польш тоглогч Наполитэй гэрээгээ сунгах тохиролцоонд хүрээгүй байгаа бөгөөд тэдний өрсөлдөгч Интер Милан түүнийг авахаар энэ зун хөөцөлдөх магадлалтай. 

Ллойд Келли /25 настай/ Борнмут

Энэ зун Келлиг авахаар Тоттенхэмээс ирсэн 20 сая фунт стерлингийн саналыг Борнмут зөвшөөрөөгүй бөгөөд олон талт хамгаалаган тоглогчоо үнэгүй алдах эрсдэлтэй болоод байна. Энэ сард солилцооны цонх хаагдахаас өмнө сүүлчийн шийдвэрээ гаргах ба одоо түүнийг АС Милан, Ливерпүүл, Ньюкасл, Юнайтед зэрэг багууд сонирхоод эхэлжээ. 

Тиаго /32 настай/ Ливерпүүл

Ливерпүүл энэ зун хагас хамгаалалтын шугамаа бүхэлд нь өөрчилсөн ч 32 настай Тиагогийн гэрээ дуусгавар болоход түүнийг багаас явуулж магадгүй юм. Гэмтлийн улмаас түүний нөлөө их биш байсан. Хагас хамгаалалтад туршлага авчрахуйц Испани залуу одоо Саудын Арабын Про лиг рүү явж ч магадгүй болоод байна. Саудын Арабын Про лиг сүүлийн саруудад Энфилдээс хэд хэдэн тоглогчийг лигтээ нэгтгэсэн бөгөөд Тиаго ч дараагийн бай нь болох боломжтой.