1982 онд Өмнөговь аймагт төрсөн. Дөрвөн хүүхэдтэй айлын том нь. Бага байхдаа бол гүйлтийн мундаг дэлхийн аварга болно л гэж боддог байлаа. Дарга болно гэж бас боддог байсан.

Гадаадад марафон гүйлтийн тэмцээнд ороход хэцүү зүйлс олон байсан. Хамгийн хэцүү үе 2017 онд байсан болов уу. 2017 онд анх удаа Шри Чинмойн нэрэмжит өөрийгөө ялах, олон өдрийн гүйлтийн аварга болсон. Тэмцээнд цэвэр сэтгэлзүйн тэмцэл болдог доо. Хөл өвдөнө, хумс салж унах, өвдөгний нүдээр хатгуулах ч гэх юм уу олон зүйл болно. Хамаг яс янгинах гэх мэт зүйл болно, тэр байдлаас илүү сэтгэлийн байдал л маш чухал. Тэр бүхнийг дааж гарах хүч, дархлаа хэрэгтэй. Сэтгэлийн дэм их хэрэгтэй байдаг юм билээ. Гадаадад марафонд оролцоход хажууд байгаа хүмүүсийн сэтгэлийн дэм чухал. Зүгээр нэг дэмжих биш, бүр чин зүрхнээсээ дэмжиж байгааг мэдрэх бол том хүч болдог. Тийм хүмүүс л их хэрэгтэй болдог санагдсан. Дэргэд байх хүмүүсийн сэтгэлийн дэм л их дутагддаг юм. Хүн чинь сэтгэлийн амьтан болохоор... Зовж, ядарч тэнгэр хол, газар хатуу болох үе гэж ярьдаг даа, нусаа хацартаа наана гэдэг шиг тийм л үед сэтгэлийн тэнхээ, чин сэтгэлийн дэм л чухал болдог.

Онцлох амжилтуудын хувьд хамгийн анх 2014 онд АНУ-ын Нью Йорк хотод олон өдрийн гүйлтэд оролцож байсан. Тэмцээндээ ялагч болж, цомоо аваад Америкийн “Wall street journal” гээд дэлхийн эдийн засгийн тэргүүлэх сэтгүүлд миний Монголын далбаатай зураг гарсан байсан. Тэр үеийн амжилт онцлох гэж боддог. 2017 онд мөн аварга болсон. 2022 онд 48 цагийн гүйлт буюу 2 өдрийн гүйлтийн дэлхийн аварга шалгаруулах тэмцээн гэдэг нэршилтэй анх удаа зохиогдоход анхны аварга болсон. Тухайн тэмцээний дараа “New York Times” сэтгүүлд миний зураг мөн гарч байсан.

Спортын тамирчин байхад аав, ээж минь л хамгийн их тусалдаг байсан. 10 жилд хөдөөний малчин айлын хүүхэд тэмцээнд орох гээд явахад зардал мөнгө байхгүй. Малчин айлд бэлэн мөнгө байхгүй. Хавар цагт ноолуур зарж мөнгө олох ч гэх юм уу, намайг тэмцээнд явуулах гэж ээж, аав хөөцөлддөг байсан. Би тод санадаг юм даа... Хот руу тэмцээнд явах гээд мөнгө байхгүй, манай ангийн хүүхдийн аав, ээжээс гэрийнхэн мөнгө зээлээд намайг тэмцээнд явуулж байсан. Тэмцээн дээр хажууд болж дэм болох бол хамгийн чухал байдаг. Тийм дэмжлэг бол ямар ч санхүү, мөнгөнөөс илүү дэмжлэг. Монгол хүмүүс тэмцээн дээр ирж дэмжиж байсан. Миний тусалж байсан хүмүүсээ бодохоор хамгийн их дэмжлэг үзүүлсэн хүн гэж бодвол нэг Америк залуу байдаг даа.Америкийн Вискинсон мужийн Милауки хотод болсон гүйлтэд тусалсан залуу байдаг. Хоёр, гурван Монголчууд ч байсан. Зарим хүмүүсээ онгоцны зардлыг нь гаргаж, цалинжуулаад туслуулдаг. Харин тэр залуу бол нэг гаргүй, хөгжлийн бэрхшээлтэй залуу байсан. Хажууд нь хоёр гартай хүмүүс байхад нэг гартай хэр нь ээ тэр хүмүүсээс ч илүү хачин сайхан тусалж байсан юм. Надад туслах гээд ирэхдээ онгоцоор ирнэ. Буудал, хоол гээд бүх зардлаа өөрөө гаргасан. Надад туслахдаа нэг ч төгрөг надаас авалгүй тусалж байсан. Би мөнгө өгье гэхэд авахгүй гэсэн. Чи яагаад мөнгө авахгүй тусалсан бэ гэж өөр нэг Монгол хүн тухайн эрээс асуухад би хүнд тусалж муу үйлээ барж байгаа юм гэж хариулсан байсан. Үйлийн үрээ нимгэлж, буян үйлдэж байгаа юм гэсэн байсан. Тэр Америк залуугийн чин сэтгэл гаргаад дэмжиж, туслах байгаа нь гайхамшигтай. Би зургаан хоног гүйхдээ өдөрт нэг цаг, зарим өдөрт гучин минут л унтана. Тэгээд явахад надтай яг зэрэг унтаж, зэрэг сэрж, нойроо надтай зэрэгцэн хасаж тусалж байсан чин сэтгэл тэр бол маш чухал байсан.Тэрнээс өөр тэгж тусалж байсан хүн байхгүй. Цаашид ч гэсэн яг тэр хүн шиг тийм агуу сэтгэлтэй туслах хүн хэцүү дээ. Тэр хүн өөрөө санхүүгийн хувьд ч баян мөнгөтэй хүн байгаагүй ч миний тэмцээний төлөө өөрөөсөө золиос гаргаж, сэтгэлээ тултал гаргасан нь хамгийн сайхан санагддаг.

Msports app-аар дамжуулан спорт бараа бүтээгдэхүүний "Olympus" дэлгүүрээс хөнгөлөлттэй үнээр худалдан авалт хийгээрэй.

Супер хүчтэй болох боломж байсан бол сэтгэлийн хүчийг сонгоно. Биеийн супер гэж байдаг шиг сэтгэлийн тэнхээ, сэтгэлийн агуу хүчийг сонгоно. Өөрийгөө ялах чадвар юм даа, миний гүйлтэд их чухал. Одоо ч бас би тэр хүчийг сонгосон байгаа. Хүн болгон өөрийгөө ялан дийлэх, тэгснээрээ сэтгэлийн амар амгалан, аз жаргалтай амьдрах боломжтой гэдгийг хүн төрөлхтөнд харуулах байсан. Одоо ч бас үүнийг гэрчилж харуулж явж байгаа, супер хүчтэй байсан бол улам илүү харуулна.

Олон өдрийн гүйлтэд гүйж байхад маш их юм бодогддог. Эхлээд бол маш их ядарна. Ядраад эхлэхээр би ер нь юу хийгээд байна аа гэж бодогдоно. Би хэрэггүй юм, шал дэмий юм хийгээд байна гэж бодогддог. Тэгж бодохоороо би ахиж хэзээ ч ийм олон өдрийн гүйлтэд гүйхгүй ээ гэнэ. Зодог тайлъя гэх мэт бодлууд орж ирнэ. За яахав энэ тэмцээнээ дуусгая гэж бодно. Тэмцээн дууссаны дараа хоёр, гурван хоногийн дараа тэр бодлууд нь арилчихна. Яг тэмцээний үед бол өөр олон л зүйл бодогдоно. Өөртөө жижиг, жижиг зорилгууд бодчихсон байна. Ингээд гүйчихвэл дараа нь тэрийгээ ингэнэ дээ гэх ч юм уу. Ингэж гүйснээрээ сайн сайхан юманд хүрнэ гээд янз, янзын л юм боддог.

Эмэгтэй хүний чин сэтгэлд л дуртай. Чин сэтгэл гэдэг бол ямар нэгэн ашиг сонирхол, нөхцөл болзол, ямар нэгэн заль мэх байхгүйгээр чин зүрхний сэтгэлд дуртай. Сэтгэлийн угаас бодож, ярьж байгаа байдалд нь татагдана. Оюун ухаан бүрийн эго өөр. Тийм бодлоор биш дотоод сүнсний, дотроос гарч ирж байгаа чин сэтгэл нь үнэн байдаг. Дотоод сүнсний үндсэн зан байдал, гүний сэтгэл бол ариун байдаг. Тэр чанараараа байдаг шинжид дуртай. Найз охинтой болбол тийм сэтгэлтэй хүн байгаасай гэж хүсдэг. Яг ийм сэтгэлтэй хүн байдаг бол сайхан л байна.

Энэ дэлхий дээр миний хамгийн дуртай зүйл “Inlightment”буюу гэгээрэл. Гэгээрэлд дуртай.

Монголын өнөөгийн нийгмийг хараад Монгол хүмүүс агуу хүсэлтэй байгаасай гэж хүсдэг. Монголчууд хэтэрхий жижиг хүсэлтэй байдаг юм байна. Жижигхэн хүсэлтэй хүмүүс чинь жижиг амьдардаг. Том хүсэлтэй хүмүүс ядаж томдоо хүрдэггүй юм гэхэд дундаж амьдарна. Том хүсэлтэй, том амьдрах боломжтой юм уу гэвэл Монголчуудад байгаа. Том амьдарч байсан уу гэвэл байсан. Монголчууд өвөг дээдсийнхээ нэрийг гутааж амьдарч байна. 13-р зууны үе, Монголчуудын дэлхийд данслагдаж байсан сүр хүчийг бодоход одоо бол жижиг хүсэлтэй, жижиг амьдарч байна даа гэж хардаг.Монголчуудыг тийм биш байгаасай гэж хүсээд 2013 онд “Зөв хөгжил, агуу үндэстэн” гэдэг ном бичсэн. Номын дэлгүүрүүдээр худалдагдаад дууссан. Хуучин номын дэлгүүрт байж магадгүй. Тэр номыг уншвал Монголчууд яаж, ямар бодолтой байж том байх юм гэдгийг харна. 21-р зууны нийгэм эдийн засгийн байдал гэх мэт зүйлүүд байгаа. Олоод уншвал хэрэгтэй л зүйлүүдтэй. Хүнээс хамгийн дургүй шинж чанар миний хувьд худлаа байх. Худлаа дүр эсгэдэг, мундаг харагдах, зальжин байх занд дургүй. Үнэн өөрийн шинж чанараараа л байх таалагддаг.