Монгол улсад сагсан бөмбөг лигийн түвшинд хөгжиж энэ жил 30 жилийн ойгоо тэмдэглэлээ. Эдгээр 30 жилд лигийн хөгжил жил ирэх тусам шат ахисаар өнөөдөр хамгийн олон үзэгчтэй, багууд нь хамгийн олон үнэнч хөгжөөн дэмжигчидтэй, тоглолтын ордон дүүрэн үзэлттэй тоглолтууд маш ширүүн өрсөлдөөнтэй болсоор байна.

Сүүлийн 3 жилийн хувьд Сагсан бөмбөгийн хөгжилд Уранган ХХК томоохон хувь нэмэр оруулж 3000 хүний суудалтай ордон барьсанаар бид Лигийн тоглолтыг тав тухтай үзэх болсоноос гадна олон улсын тоглолтыг нутагтаа хүлээн авч тоглуулах боломжтой болсон. 

Гэвч сайны хажуугаар саар зүйл байсаар л... Багууд лигт амжилт үзүүлэх, сагсан бөмбөгт дуртай үзэгч хөгжөөн дэмжигчидээ уйдахгүй байх, тоглогч нараа мэргэжлийн түвшинд давхар ажил хийлгэхгүй хангалттай хэмжээнд цалин өгөх зэргээр багуудын 1 жилийн дундаж төсөв 1.4-2 тэрбум төгрөгт хүрээд байна. Гэвч тэд тасалбар болон бусад орлогоос хувь хүртэхгүй хэвээр л...

Чи зардлаа гаргаад гоё тоглолт үзүүлж үзэгчдийг тат, бид орлогоо авья. Шагналын сангаа өсгөе гэсэн байдлаар 3 жилийн нүүрийг үзэж байгаа талаар багуудын удирдлагууд ярьсаар л. 

Угтаа бол үзэгчид эдгээр багууд, эдгээр багуудаас цалин авч байгаа тоглогч нарыг үзэх гэж л мөнгө төлж очиж байгаа. Тэгвэл эдгээр багууд урт хугацаанд оршин тогтнохын тулд нийт орлогоос хувь хүртэх нь шударга.

Дан ганц тасалбарын орлого бус энд маш олон төрлийн орлого яригдах нь болно. Шууд дамжуулалт, спонсор, бусад... Бидний сайн мэддэг NBA бол багууд хувь эзэмшиж бүгд тасалбараас гадна бүх орлогоос хувь хүртдэг.

Яг одоо буюу өнөөдөр NBA-ын Супер од тоглогч байсан 34 настай Demarcus Cousins Сэлэнгэ Бодонс багийн өмнөөс Монголын Дээд Лигт эхний тоглолтоо хийх гэж байна. Мэдээж хэрэг тасалбар гарсан даруйдаа дууссан. 

МСБХ лигийг хөгжүүлэх маш олон ажлыг зохион байгуулж байгаатай маргахгүй, гэхдээ багийн эздийн оролцоо, хүчин зүтгэл, оруулж буй хөрөнгө оруулалттай маргах аргагүй.

1994 оноос эхэлсэн Монголын дээд лиг өмнө нь орлого хувааж байсан уу? Тийм ээ байсан тасалбар 500 төгрөг 1000 төгрөг байхаас эхлээд Спортын төв ордон дүүрсэн олон тоглолтууд болж байсан үед тоглосон багуудад орлого өгч байсан. 

Цаашид лиг тогтвортой үйл ажиллагаа явуулахын тулд харилцан ашигтай WIN WIN зарчимд нийцүүлэн ажиллахгүй бол яг ид хөгжиж буй сагсан бөмбөгийн лиг дахин талцал хуваагдалд орох вий гэсэн болгоомжлол байсаар байна.  

Мөн багууд зардлаа босгох гэж хэзээг хүртэл дан ганц спонсорууд хайж, багийн эзэд болон багийн спонсоруудын нуруун дээр бүх зардал байх бэ?